Policy Coordination Committee
Mizoramin sawrkar 10 chuang kan hrawn takah te khan sawrkar thar apiangin hmalakna thar engemaw tak an kalpui thin a, chung zinga langsar tak chu ‘committee thar din’ hi a ni awm e.
Tun sawrkar thar pawh hian, election campaign laia an auhla ‘kalphung thar’ dungzuiin hmalakna thar eng eng emaw an kalpui nghal a, chung zinga pakhat pawimawh tak chu ‘Mizoram State Policy Coordination Committee’ hi a ni kan ti thei ang.
A tlangpuiin committee din tharte hi a hming a ropui thei hle a, committee hming atang ringawt hi chuan, ‘Mizoram chuan hma kan va sawn nasa dawn rua mai em!’ han tih maina tur hi a ni ta thin a; mahse, kum 50 chuang zet chutiang committee ropui tak tak hmanga enkawl seilen Mizoramah hian kan ram hruaitute chuan ‘hma kan la dawn’ an la ti reng thei a. Committee ropui tak takte khan an hming phawk chhuak zo turin hna hi an thawk kaw tak tak thei lo, ti ila, kan tun dinhmun mek hian a hril chiang mai awm e. Chawhrualin kan ‘standard of living’ hi a ropui tak tak thei rih lo a, chutih laiin kan ‘standard of fashion’ erawhin ‘developed country’ te rual a pawl viau lawi si a!
Tuna Policy Coordination Committee hi February ni 9, 2024-a din a nih atangin tun thlengin vawi thum an thukhawm tawh niin hriat a ni a. Tunhnaia thutkhawm hnuhnun ber khan thlai thar lei turte collection centre tur leh data entry centre dahna turte an ruahman fel a.
He committee meeting vawihnihna, March 14, 2024-a neihah khan chief minister chuan an hnathawh ber tur chu Hand Holding Policy enkawl a nih thu te, concern department-te hmalakna a tul anga an enpui thin tur thu te, thurawn pekte leh hmalakna kal kawppui theih chi te, central lama funding source zawn belh thlengin an thawk dawn niin a sawi a. Hand holding policy atan hian sawrkar kumthar budget-ah cheng vaibelchhe 200 dah a ni nghe nghe.
He committee hi notification tihchhuahah kha chuan ‘advisory body to various departments’ tih a ni a, a huam zau hle. Chuvangin, thlai thar pali lei tur buaipui bakah hian, eng tinnge department thenkhatte hian hlawk zawka kuthnathawktute tharchhuah an tihpun anga, chumi hmang chuan kan state economy hi eng tin nge kan chawisan theih ang tih ngaihtuahna seng turin mipui chuan kan beisei tlat dawn a ni.