Policy hmanga inbeihna zawk…
Inthlanpui atana inbuatsaihna kal mekah, party hrang hrangten sawrkarna siam ngei tumin hma an la mek a, party thenkhat chuan, sawrkarna siamtu lama tel ve hram tumin an bei ve bawk a.
Political party-te hian sawrkarna an siam huna ram leh hnam an kaihhruai dan tur ruahmanna leh tihtur hrang hrang pholanna – ‘manifesto/policy’ an nei a, chu chu mipui hnena an zawrh ber tur a ni.
Ram kaihhruai an tum dan policy hmanga mipui hmaa inzuar/inbei tur niawm tak an nih laiin, candidate-te chanchin emaw, thiltih emaw, thusawi emaw hmanga inbeihna lamah an tui chho tan leh dawn riau niin a ngaih theih a. Heti hrim hrima election campaign kalpui tum tlat zel mai hi chu a dik lo hle a, mipui pawh an khawngaihthlak zozai ta!
Mipui hian ram leh hnam vei dan hi an thiam ve tan tawh a, tunhmaa election dawna sum chelek vak vak ang khan ram ropui a thlen lo tih an hre vek tawh.
Mipuiin an thlir leh an beisei zawk chu, sawrkarna siam tum party tin te hian eng tin nge tun hma aia changtlung leh tha zawka – zirna lam te, hriselna lam te, ei bar zawnna lam te, tourism lama hmasawn zawk dan tur te, human resource develop dan tur te, environment chhe mek siam that dan tur te, inkalpawhna tha zawk leh power tha zawk eng tin nge kan neih theih ang, tihte hi a ni.
Hengte hi ‘tunhma aia tha leh changtlung zawkin kan siam dawn..’ tih tlanglawn satliah mai hi mipuiin an khamkhawp tawh lo va, ‘eng tin chiah nge hma lak a nih dawn?’ tih hi chipchiar taka hriat an duh ve tawh. Tunhma khan, ‘kan ti ang’ tih satliah ringawt hmangin politician-ten mipui an lo awi tlei thin tawh a, khatiang kha mipui hian an duh tawh lo.
Tute emaw chanchin chin pawr a, inpuhmawhna leh insawifiahna press conference neih zur zut hi mipuiin an ngaihlu lem lo. Chu ai chuan, ei leh bara tun thlenga la intodelh thei miah lo kan nih chhan chiang taka sawi thei leh, chu harsatna sutkian dan tur chiang taka sawi theite hi mipui duhzawng a ni zawk tawh. ‘Hetiang hmang hian party-te hi inbeiin mipui min hneh tum zawk se’ tih hi mipui rilru a nih a rinawm.