KA LUNG A LENG!

By Zoremi Hmar Zote

Hun leh ni a liam zel a, furpui hun nuam kan lo thleng leh ta reng mai. Kan hunpui neih zingah fur hian lung a len deuh berin ka hria e; a chang chuan zingkarah chhum a zing mup a, a chang chuan khua a thiangin ni a sa vawl vawl bawk a, khua a lo dur a, chhum dumin van a rawn khar khup khup a, ruah mal lian pui pui khât deuh deuhin a rawn tla phuar phuar a, vaivut rim a rawn nam chem chem a…
Hetiang hunah hian kan têt lai kha ka ngai zual thin. Nu te an han feh ngei a, a hmuak turin kawtchhuah aia hla hretah kan kal a, nu te chhâwkna tur iptepui emaw, êm emaw kan han phur ve ngei a, thosi leh vaihmite kârah nghakhlel takin nute kan lo hmuak thin. Mi nu te an lo thleng zut zut a, an tel ve dawn ta lo emaw ti-a beidawn rum rum hnu-ah kan nute ngei mai chu an rawn lang ve ta, heta kan hlimna hi pawisaa lei theih ni se a to viau ta ve ang. An rawn thleng a, Lengser rim an rawn nam hak a! An thil rawn hawn vaimim te, fanghma leh maian te, thlai chi tinreng an rawn phurh te chu kan zawh tawkin kan lo laksak ve a, hah pawh hre lovin hlim takin kan haw thin.
In kan han thleng a, eirawng bawl rual kan la nih miau loh avangin hah pawh sawi lovin nu ten rawng an han bawl a, keinin an vaimim hawnah duh kan lo thlang a, min rawhsak turin kan lo nawr ve ngang ngang bawk a, vaimim chhip no thuai bungin tulthirin an han vit a, thuk sirah min han rawhsak ta ngei a, nghakhlel em emin kan lo thlir dauh dauh a, maian hih pahin min han vilsak a, a puak ri tek tek chu ngaithlain kan thla a muang em em mai thin. A lo hmin a, an thulthir rawlh an phawi a, chhuata lirh phei pahin, “Chhuat dâi hâng…” an han ti a, kan lo ûm chan chan thin. Vaimim keh thar hlim rawh kha a lo hâng tui ngawt mai.
Thuk pakhatah chawbel an han chhuang a, thuk lehlamah inbual tui tur an chhuang bawk a, inbual tui a lum veleh pa ber a han inbual phawt a, nu ten maian bai bel an lo chhuang leh bawk a, maian sih thar, tharlam em em mai leh la hring sar mai chu berul leh rahno dang nen an han bai a, suan hun tepah lengser an han thlak a, an chawk rawk rawk a, an suan ta thin a, a tui dan chu danglam tak a ni. Heng laia kan lei, engtika sih nge pawh hriat loh, a kuang hmawr eng deuh thut tawh bai nen chuan inthlau tak a ni. Antam tlakna tui tur an han chhuang leh zat a, thlawhlai tamkawr, hâng kha fak mai leh tharlam zet tui hâng hawp te kha tui ve tak chu a ni. Hmarcha hring an han râwt tel ngei a, zobuh chhum rum theh thawh, ban tui tak nen kan han ei a, duh aia tam ei mai a awl thin hle. Khaw thim dawn ruaiah ruah a’n sur a, thereng hram chiah chiah kara ruah sur ri ngaihthlak te kha a lo nuamin a lunglenthlak ngawt mai.
Mizote hi hnam taima tak kan ni; tu chhungkua pawhin buh leh thlaia intodelh kha kan tum vek a, buh kham khawp thar loh kha kan thil hlauh ber a ni thin. Khang hun laia thingtlang khua te khan kan neih ve vek mah ni se thlai thar in thartem te kha kan nunah a bet tlat a, sem sem dam dam nun kha kan la kan nunah khan a bet tlat a, nu ten chumi khami chu va pe rawh u an tih chuan thuawih takin kan tlan nghal vat vat thin. Thlai thar mai bakah bai insuah te kha kan la uar viau mai a, khang hun laia kan nun kha a lo chhuanawmin a lo tha ngawt mai. Zonun ze mawi hrang hrang, aia upa zah te, tlawmngaihna leh thil phalna te, kan inhmangaih tlân dial dial dan te kha hman lai chang mai atan zawng, a pamhmai deuh lam chu a ni e.
Tunah zawng kan zia a lo danglam ta; khawpui bikah phei chuan insi lek lekin in kan sa a, thlai thar inthartem leh bai insuah chu sawi loh, hmuh pawh kan inhmu ngai mang lo a ni a, inthenawm khawvenna thila kan Mizo zia kha kan paih ta hret hret niin a lang a, a uiawm ngawt mai. Kan in a inhnaih tulh tulh a, kan thinlung a inhlat tulh tulh tih ang mai kha kan ni zo ta. Kawng lehlama ngaihtuah chuan kan hnain a zir vang te, kan nitin nunphung a lo danglam tak vang te pawh a ni pakhat ve ang. Mahni tawkah mi tin kan buai em em vek a, thenawm ina chuan kai fo pawh a har ve a ni ang e. Chawhmeh ni se mahni thar kan nei meuh lo va, kan lei vek a nih avangin, han inpe tur chuang kan awm bik lo.
Khawpuia awm te kan vanneihna chu kumtluana thlâi hnah leh rah lei tur a awm reng hi a ni awm e. Thar thuah chuan an tharlam em em hran lo a, mahni huan thlâi tharlam tak ei phâk kan awm meuh lo. Aizawl veng tinah kawngpui sirah chawhmeh an zuar del dul a, a tharlam lo tih hre reng mah ila duh thlan tur a awm chuang lo; chuvangin kan tet laia mahni thar chhuah ngei mai, tharlam leh tuihnai kan ei theih hun lai kha a lo nuam ber mai. Lungkham em em awm lo, nu leh pa thlazar hnuaia thawveng zeta kan awm lai, kan tet lai kha ka ngaiin, ka lung a leng ngawt mai.