Political party-ten SIR 2026 hearing neih hun chhung pawhsei an ngen

Mizoram-a Special Intensive Revision 2026 of Electoral Roll neih mekah dan dik loa luh tum an awm nia an hriat thu political party ho chuan an sawi a. Felfai taka a lut tur chin chauh an luh theihnan ‘claims and objections’ lai, hearing neih hun chu pawhsei sak turin Election Commission of India an ngen.
Mizo Zirlai Pawl General Headquarters kaihhruaiin Zirtawpni khan all political party an thukhawm a. Zoram People’s Movement, Mizo National Front, Mizoram Pradesh Congress Committee, Bharatiya Janata Party leh Peoples’ Conference party aiawh telin, Election Commission of India (ECI) in Special Intensive Revision 2026 Mizoram-a kalpui mek an sawiho.
Thutkhawmah hian lungrual takin thawhhona tur an duang a. Mizorama SIR 2026 kalpui mek chu, khua leh tui dik takte dikna chanvo humhimna a nih avangin felfai taka kalpui a nih theihnan thawhho zel nise an ti a. Hearing neih mekah khua leh tui dik tak ni lo, electoral roll-a luh tumte chu pui lo tur leh tumahin tan lo turin tanrual tha an ti. Political party zawng zawng pawhin hemi chungchangah hian mahni party tinah hriattirna tihchhuah nise an ti bawk.
Document lem hmanga electoral roll-a luh tum an awm chu an dem takzet tih sawiin, hetiang hmuhchhuah chu thuneitute hnenah hriattir zel nise an ti a. Hearing neih mekah official-te fimkhur taka hma la turin an beisei tih sawiin, hna thawk theilote chu dan anga an phu tawk hremna pek ngei nise an ti.
Hearing neih hun chu fur lai a nih avang leh thingtlang khaw kilkhawr tak tak, kawng chhe tak tak paltlang ngai a nih avangin ERO, AERO te an hahin, an indaih lo em em a, hearing neih kharna – August 4 chu SIR 2026 felfai zawk neih theihnan a hun hi pawhsei ngen nise an ti a. Heng an thurel hi Zirtawpni tlai khan joint chief electoral officer Mizoram hnenah ziakin an thlen nghal a ni.