Taylor Swift ‘The Life of a Showgirl’-in record a siam

Taylor Swift ‘The Life of a Showgirl’-in record a siam
Taylor Swift album thar ‘The Life of a Showgirl’ chuan modern era (1991 hnulam) a kar khat chhunga US-a album hralh tam ber record a siam a, kum 10 vel zet Adele ‘25’ record ding tawh a rawn khum ta a ni.
He album hi October ni 3-a tlangzarh kha niin, October ni 9 thlengin US-ah copy maktaduai 3.4 an hralh hman a, hei hi album tak tak hralhna (physical leh digital purchase) niin, November 2015-a Adele album ‘25’ record, kar khat chhunga maktaduai 3.378 hralh theih chu a rawn khum ta a ni.
Album hralh zat chhut nan hian album tak tak (physical leh digital sales) hi traditional sales an ti a, hei bakah hian album-a hla streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Tuna record hi chu traditional album sales bik a ni a, modern era an tihna chhan pawh hi Luminate-in 1991 atangin tracking data an tih tan chauh vang a ni a, Luminate chhinchhiah danin kar khata US-a traditional album sales maktaduai 3 chin tling thei album pahnih chiah a la awm a, ‘Showgirl’ leh ‘25’ chiah niin, 2000 khan *NSYNC album ‘No Strings Attached’ chu kar khatah US-a traditional sales maktaduai 2.416 a tling thei bawk a, US-a kar khat chhunga album traditional sales-a maktaduai 2 chin kai thei pathum chiah a la awm bawk.
Taylor Swift ‘The Life of a Showgirl’ hi Billboard 200 (US albums) chart-ah pawh a No.1 ngei dawn a, chart ranking hi naktuk-ah a hriat theih chauh dawn a, hetah hi chuan traditional album sales bakah streaming atanga album hralhna tlukpui leh album-a hla a mala hralhna te pawh belhkhawm vek a ni thung ang.