Post Malone & Morgan Wallen ‘I Had Some Help’ a la Hot ber

Post Malone ‘I Had Some Help’ featuring Morgan Wallen chu Billboard Hot 100 (singles) chart-ah a No.1 a, he chart-a kar thum a No.1-na a ni ta. Hetihrual hian Zach Bryan hla thar ‘Pink Skies’ pawh top 10-ah a debut.
Billboard Hot 100 chart hi kar khat chhunga US-a hla lar dan tehna niin, cart ranking siam nan hian all-genre US streaming (official audio leh official video), radio airplay leh sales data te chu tehna pawimaw a ni.
‘I Had Some Help’ hian a kar thumnaah US-ah stream maktaduai 47.4 leh sales 15,000 la nei theiin, radio airplay-ah pawh ngaithlatu maktaduai 52.4 a la nei thei a, hei hi a kar thum nan chart-ah a No.1 pui leh ta a ni.
Chart No.1 hlui Kendrick Lamar ‘Not Like Us’ chu No.2-ah bawk a la awm a, Tommy Richman ‘Million Dollar Baby’ pawh No.3-ah bawk la awmin, Shaboozey ‘A Bar Song (Tipsy)’ pawh No.4-ah bawk a la awm a, Sabrina Carpenter ‘Espresso’ chu No.6 atangin No.5 a kai thar ve leh thung.
Zach Bryan hla thar ‘Pink Skies’-in stream maktaduai 31.6 leh sales 10,000 neiin, radio airplay-ah ngaithlatu 1,66,000 a nei thei bawk a, hei hi chart No.6-ah a debut pui ta a ni. Bryan hian he chart top 10-a lang thei hla pathum a nei tling ta bawk.
Chart No.1 hlui Teddy Swims ‘Lose Control’ chu No.7-ah bawk a la awm a, chart No.1 hlui tho Hozier ‘Too Sweet’ chu No.9 atangin No.8 a kai thar leh a, chart No.2 pawh lo ni tawh Benson Boone ‘Beautiful Things’ chu No.8 atangin No.9-ah a tawlh a, Billie Eilish ‘Lunch’ chu No.5 atangin No.10-ah a tawlh ve thung.