Power atanga hlep…

Kawlphetha Megawatt 24 pe chhuak thei tur Tuirini Small Hydro Electricity Power Plant dinna tur lungphum chu nimin khan Tuirini kamah chief minister chuan a phum a. Hetianga state puala kawlphetha tharchhuah theihna kan neih belh leh ta hi thil lawmawm tak a ni a, power lama hmasawnna tur rahbi pawimawh tak a ni.
Tun dinhmunah, state puala hydel project leh solar power plant kan neih atanga power kan tharchhuahte hian kan mamawh zat hmun ngaa thena hmun khat pawh a la tum pha lo a ni a, chu chuan power-a intodelh tura tanlakna tur a la tamzia a tarlang chiang mai awm e.
Hetih lai hian power atanga hlep kan neih dan (power trading) nimina chief minister-in a tarlan kha, assembly session leh hmun dang dang pawha a lo sawi thin tawh a ni a, he power trading atanga hlep hian power management pawh nasa takin a chhawk zangkhai ang tih a rin theih awm e.
Chief minister-in a sawi dan chuan, an sawrkar ve hnua power trading atanga sum hmuh zawng zawng hi cheng vaibelchhe 172 chuang a tling tawh a, chuta tanga hlep chu Rs. 87,21,40,250 (vaibelchhe 87.21) a ni. Power bill pek that avanga Rebate an hmuh tawh zawng zawng pawh Rs. 6,57,93,152 a ni tawh a. Bill pek that vanga hlawkna an hmuh leh power trading atanga hlep hmuh tawh zawng zawng chu cheng vaibelchhe 93.79 (Rs. 93,79,33,402) tihna a ni.
Chuti a nih chuan, kum hnih an sawrkar chhung hian power bill pek that avangin kum khatah chawhrualin cheng vaibelchhe 46.89 an hlep tihna a ni a. Bill hi an pe tha reng a nih a, power trading a kal tluan zel chuan, a lo berah tuna hlep hmuh anga chhut hian, kum nga chhungin cheng vaibelchhe 234 vel an hlep thei dawn tihna a ni awm e.
Tuna power trading leh bill pek that zara hlep tlingkhawmte hian, Tuirini project cost cheng Vaibelchhe 676.98 atanga state tum ve tur 20%, cheng vbch 135.39 hi a tum thei var var dawn tihna a ni. A hahdamthlak dawn hle. Hlep na na na chu duh duhnaah a hman theih awm si a.
Tun sawrkar thar hian, an sawrkar tirh atangin thil thar tha tak tak an rawn hai chhuak thin a, thil eng eng emawah sawi leh sep han kai deuhna te chu an nei ve bawk awm e, zep thu a cheng lo. Bana kaih scheme hnuaia sawhthing leinaa thil chingpen a awm an zep lo te kha a tha. Perfect tum loh tur, diklohna zep hi, a lo lan chhuah leh tho thin avangin, engti kawng mahin a hlawk ngai lo.