Nikum Sociedad muala tlawm tawh Barca kuminah an tlawm nawn leh!

Nikum Sociedad muala tlawm tawh Barca kuminah an tlawm nawn leh!
Marcus Rashford chuan an siphurh sut zet mah se he goal an thah hnu lawka goal khat an chhuah zui leh nghal zat avangin Real Sociedad khelmual hman thiam Municipal de Anoeta stadium-ah 2-1-in Catalan team an chak lo a, Spanish La Liga table-ah hma la hruai der der mah se Inrinni zana hnehna chang bik Real Madrid nen league round dang an khelh leh hma zawng chu point khat lekin an inthlau chhunzawm rih phawt dawn.
Mualneitu team goal hmahruai hi first half minute 21-a Mikel Oyarzabal tihluh niin, an goal khat chhuah hi chawlhlawk hmain Barca-in an sut zo lo.
Second half minute 70-ah Lamine Yamal chhawpsak atangin substitute Rashford chuan mikhual siphurh sutna goal tilutin, nikum November ni 2 hnu lama a La Liga goal hmasaber hmang hian Barcelona phur thar bawk mah se minute khat pawh a liam hmain Sociedad captain Oyarzabal goal tur siamsaktu Goncalo Guedes chuan home team hmahruai nawnna goal a khung ve leh nghal.
San Sebastian khaw inkhelah goal dang a luh belh theih tak loh avangin La Liga hmahruaitute’n an elpui lian ber Real Madrid nena an inkar pawhzau leh tumna an puitlin zo lo.
Bench atanga luta Barca siphurh sutna goal tauhluttu England forward Rashford khan Manchester United atanga loan-a Spain ram a pan hnuah Nou Camp club tan inelna hrang hrangah goal riat a thun tling ve ta a, mahse, Pathianni zana a goal khat thawhin a team vawn lai tlawm tur a chhan zo lo.
Barcelona khan a tir phat atangin an nawr na hle a, a tir lam minute 30 chhungin Fermin Lopez, Frenkie de Jong leh Lamine Yamal-te’n goal khat diat diat an thun vek a, mahse, offside avangin pawmsak an ni lo vek!
Penalty pawh an hlawhchhuak a, first-half hun pek belh zawh dawnah Igor Zubeldia chu rawlthar kum 18 mi Yamal lakah a foul a, referee-in penalty ham nghal zet mah se VAR endik tura thawn a nih hnuah Barca player dang lo offside avangin he spot-kick hi hnuhkir a ni.
Second half tir lam minute 47 leh 49-ah attacking midfielder Dani Olmo chuan tum hnih ngawt goal ban a chhuihper a; Barca substitute Robert Lewandowski tauhluh tur pawh Sociedad goalkeeper Alex Remiro chuan goal kham chungah a namliam thei hram a ni.
Hun pek belh minute 88-na a kal mek laiin Sociedad player Carlos Soler chu Pedri laka a foul avangin straight red card hmanga hnawhchhuah ni mah se season liamta ang bawkin an kawtkaiah Barcelona an hneh nawn leh ngat a ni!
League season kal laia vawi thum tlawm tling ta Hansi Flick-a team khan inelna hrang hranga match 11 chhung an chak zawn mekna an thlah fel a, league khelh 20 atanga point 49 hum chungin point 48 nei ve tawh Real lakah hma an la hruai der der a; Sociedad erawh pariatnaah an tawlh chho.
Top four luahtu dang pathumna Villarreal leh palina Atletico Madrid-te chuan point 41 ve ve an hum mek.
Real Sociedad laka an tlawm hnuah Barca captain Frenkie de Jong chuan goal thun theihna hun remchang vawi duai lo nei zawk an nih avangin chak phu zawk an nih thu a sawi a; an hun tha neih khati zozai kha goal-a chantir tur an nih thu sawi chhunzawm chungin an khel tha tih a sawi a, lehlam keeper Alex Remiro lo khel tha ve zel kha an tuar ve pah bawk tih a tarlang tel!