Power lei leh hralh lama NE
enkawltu Committee inhmukhawm
Hmarchhak state-a kawlphetha lei leh hralh kawnga a khaikhawmtu ber, North Eastern Regional Power Committee hnuaia heti lama indawr tawnna buaipuitu sub committee chuan Mizoramah intawhkhawm – 48th Commercial Coordination Sub-Committee Meeting of North Eastern Regional Power Committee an hmang.
Thenzawl Golf Course & Resort Convention Centre-a hun an hman hawnna hmanpuitu Mizoram Power & Electricity minister R Lalzirliana Green Energy siamchhuah lamah India sawrkarin nasa takin hma a la a, National Green Hydrogen Mission tihhlawhtlinna kawngah India hmarchhaka engineer-ten ruahmanna leh hmalakna tha tak tak an neih ngei a beisei tih sawiin, “Hetiang hmalakna lamah hian NE state-ten thil tam tak kan tithei a ni tih hria ang u,” a ti.
Power siamchhuah lama Mizorama remchang awm ang leh state dinhmun a sawi a. Megawatt (Mw) 029.35 siam chhuahna hydel power plants kan neih thin bakah nikum khan Tlawva 5Mw leh Kawlbem 4Mw kan neih belh a, solar power plant hi Tlungvelah 2Mw siamna kan neih tawh bak 20Mw siamchhuak Vankalah kan nei leh tawh a, April 25 hian hawn a ni dawn a. 10Mw solar plant thar pahnih – Keifang leh Thenzawlah din tum mek a ni, tih te a sawi.
Hydel project pawh engemawzat kalpui mek a ni, tiin, a bikin tunah hian 24Mw pe thei tur pahnih Tuivawl leh Tuirini ah state sawrkar a insawrbing mek a. CPSU hmalaknain Mat Sekawi 76Mw pe thei tur leh Koladyne-II 460 Mw pe thei tur bawhzui a ni tih a sawi bawk.
P&E engineer -in- chief Lalhmingliani Hmar sawi danin, kum 1962-ah Mizoramah a hmasa ber atan kan khawpui ber Aizawl chuan power supply a hmu ve tan a, diesel generator hmanga siam a ni. Chuta tang chuan hma sawn zelin tunah chuan khaw 725 ah power hi lakluh tawh a ni.
Kum 2015 khan hetiang intawhkhawm hi Mizoramin a lo thleng tawh tih a sawi a. India hmarchhak state-ten power kan inleisak leh inhralh tawnna lama sawi ho ngai kan neihte inpawh tlang taka sawi ho turin a sawm. State hrang hrang aiawh leh corporations aiawh lokalte chungah lawmthu a sawi tih a sawi bawk. He hunah hian NE States hrang hrang atanga Power & Electricity Department aiawhte, North Eastern Regional Load Despatch Centre aiawhte, NEEPCO aiawhte, Powergrid Corporation of India Limited aiawhte leh NTPC aiawhte an tel a ni.
Power lei leh hralh lama NE enkawltu Committee inhmukhawm
Get real time updates directly on you device, subscribe now.