Sangau leh a chhehvel khaw 12-in thla khat dawn power supply an neih mumal tawh loh chungchangah Power & Electricity SDO-in thudik tawk lo thehdarh anga khawtlang hruaitu lam a puh chu pawi an tih thu Sangau Joint NGO chuan an sawi.
Sangau Joint NGO thuchhuak chuan power supply an neih mumal loh rei thu thuchhuah hmanga an auchhuahpui hnu ah Hnahthial P&E Sub-Division SDO-in thudik tawk lo sawi angah a puh tih an sawi. 33, 11kV Sub Station Hnahthialah transformer lian 1.6 MVA a chhiat avangin a thlakna tur 2.5MVA thar hmang turin bunfel tawh ni mah se, pressing hun a duh rei deuh avangin transformer 2.5 MVA awmsa pakhat chauh hmangin feeder hrang hrang inenchhawk theih ang angin kalpui mek a ni tih P&E department-in chiang taka sawi reng chung si leh, mipuiin eizawnna kawng hrang hrangah harsatna an tawh mek lai a, hetianga SDO a tawngchhuak chu thleng nawn tawh lo se tih an duh tih an sawi.
Amah, SDO ngeiin load semchhuah dan, Hnahthial Control Room-ah felfai takin hmuh theih a ni, a tih pawh, hmuh theih (phal) a tih angin, June 22 khan khawtlang hruaituten a hmunah an en a, power supply an hmuh mumal loh zia an finfiah tih an sawi bawk.
‘Electric current hi mitin mamawh a nihnaah mipui pawhin tha leh zung tamtak sengin department kan lo thawhpui fo tawh thin a, hetiangin kan thawhhona boruak tichhhe zawng thil hi thleng nawn tawh lo se kan duh hle. Mipui chuan a tul dan azirin kan theih ang angin department lam thawhpui zel kan inhuam reng a ni,’ Joint NGO thuchhuak chuan a ti.
Power supply mumal loh thu ah P&E SDO thusawi dan dem
Get real time updates directly on you device, subscribe now.