‘Practical Magic 2’-in Spider-Man uaina hrui a tichat ta
‘Practical Magic 2’-in Spider-Man uaina hrui a tichat ta
Sandra Bullock leh Nicole Kidman te channa ‘Practical Magic 2’ chuan ‘Spider-Man: Barnd New Day’ inthen sang lai uaina hrui tichatin box office No.1 a ni a, thla khat chuang mah box office No.1 ni tawh Spider-Man chu No.2-ah a tawlh ta a ni.
Box office ranking hi kartawp (Zirtawpni- Pathianni) chhunga North America (a bikin US) a cinema hall ticket hralhna sum chevel atanga tehin siam thin a ni a, ‘Practical Magic 2’ hian tun weekend kalta khan US-ah dollar maktaduai 30 lalutin box office No.1-ah a debut ta a ni.
He film hi a original ‘Practical Magic’ chu 1998-a tlangzarh tawh kha niin, a original-a Owens laizawn lema chang Sandra Bullock leh Nicole Kidman te bawk an chang dun leh a, an chhungkaw member te hmangaihna lama an vanduai em em reng mai chu a titawp dan tur an zawn dan vel tarlanna a ni.
July ni 31-a tlangzarh Spider-Man: Brand New Day-in dollar maktaduai 8.4 la lut lehin, a zawna box office No.1 tum ruk a nih hnuah No.2-ah a tawlh ve ta a, he film hian US-ah dollar maktaduai 935.171 a la lut tling ta a ni. Film tlangzarh tawh zinga US-a sum la lut hnem ber chu 2015 film Star Wars: Episode VII – The Force Awakens kha niin, dollar maktaduai 936.6 a la lut thei a, Spider-Man: Brand New Day hian dollar maktaduai khat awrh chauhin a pha tawh lo a, tun weekend lo awm leh turah chuan a lehpel thei tawh ngei dawn niin a lang.
Tom Holland channa dang ‘The Odyssey’ pawh a la kaltluang viau a, tun weekend kalta khan US-ah dollar maktaduai 7.4 la lut lehin No.2 atangin No.3-ah a tawlh a, he film pawh hian US-ah kar 9 chhungin dollar maktaduai 600.5 a la lut tling ta bawk.
Film tlangzarh thar Scott Waugh action-comedy direct ‘Runner’-in opening weekend-ah dollar maktaduai 6.4 la lut theiin, No.4-ah a debut a, he film hi Alan Ritchson leh Owen Wilson te channa a ni a, organ transplant tur a delivery lam kal fuh lo vel tarlanna a ni.
South Korean movie Na Hong-jin direct ‘Hope’-in dollar maktaduai 3.3 la lutin No.8-ah a debut a, he film hi Hwang Jung-min, Zo In-sung leh Hoyeon te channa a ni. Film tlangzarh thar dang Andrew Garfield channa, historical action ‘The Uprising’-in dollar maktaduai 3.25 la lutin, No.9-ah a debut.
Box Office Top 10:
1 Practical Magic 2 $30,000,000
2 Spider-Man: Brand New Day $8,400,000
3 The Odyssey $7,400,000
4 Runner $6,678,693
5 Coyote vs. Acme $6,239,384
6 Buddy $3,524,387
7 Insidious: Out of the Further $3,350,000
8 Hope $3,315,000
9 The Uprising $3,250,000
10 By Any Means $2,500,000