Pradhan-a a bân loh chuan state tinah CJP-in nawr tum

Cockroach Janata Party (CJP) dintu, Abhijeet Dipke chuan Inrinni hmaa Dharmendra Pradhan chu a bâng lo a nih chuan state leh khawpui hrang hrangah nawrh huaihawt an tum thu a sawi.
Dipke-a hian Pathianni zan khan X-ah hma lak zui zel an tum dan hi a tar lang a ni.
CJP hian Inrinni khan ram khawpui bera Jantar Mantar-ah Pradhan-a bân phut hian punkhawm an lo huaihawt tawh a, ram chhunga exam zawhna put ru a awm nia sawi chungchangah union education minister hi bâng turin an phut a ni.
A video-ah Dipke-a chuan, “A hmain Dharmendra Pradhan-a hi Zirtawpni (June 13, 2026) thlenga a bâng lo a nih chuan nasa zawka nawrhna huaihawt a ni dawn tih ka sawi tawh a, a bâng lo a nih chuan keimah ngei kalin khawpui leh state hrang hrangah a bân phutna nen nawrh ka huaihawt ang,” a ti.
New Delhi-a nawrh huaihawt tura hmalak dan tur dang a puang bawk a. “State chhunga nawrh huaihawt a nih hnuah pawh Dharmendra Pradhan chu a bâng lo va, huaihawt leh mai loh chu duhthlan tur dang kan nei dawn lo va. Chumi hnuah chuan ram chhung hmun hrang hrang atanga zirlaite chu New Delhi-ah an lo kal khawm ang a, muanawm takin an nawr ang,” a ti.
“Pradhan-a a bân loh hma chuan kan chawlhsan dawn lo va. Zirlai maktaduai khat chuang hma lam hun tichhiatnaah hian mawh a la tur a ni,” a ti bawk.
Tar lan tawh angin CJP hi US-a awm, Dipke-a hian Supreme Court Chief Justice Surya Kant-a’n thalai hna nei lote chu ‘chukchu ang mai’ tia a sawi hnua social media-a movement a din a ni a. Political party an ni lo va, thalaite harsatna hmachhawn hrang hrang puanga hma la tura indin niin a insawi.
Dipke-a hi India-ah kirin tun hnaia exam zawhna put ru nia sawi awmah union minister bân phutna a huaihawt zui ta a ni.