Prime Minister Modi-a Kyiv tlawhin ngaihven hlawh

Indian Prime Minister Narendra Modi chuan Ukraine tlawh mekin President Volodymyr Zelensky nena inbiakna an nei dawn a. A hma lawkah Modi chuan Moscow ah Russian President Vladimir Putin a hmu tawh bawk.
July thla khan Modi chuan Russian capital Moscow lo tlawh tawhin Kyiv leh Western capital te chuan an sawisel na hle tawh a.
Zelensky phei chuan na taka sawiselin ‘khawvel democracy ram lian ber hruaitu in Moscow a thisen chhuahtu misual a kuah’ chu hmuh hrehawm a tih thu a sawi hial a ni.
Chutihlaiin India chuan indo mek ram pahnih te ah inbuktawk taka thil kalpui tumin tun hma atang tawhin India chu zawl bik nei lo ram non-alignment approach kalpui thin a ni tia sawi a ni thung a.
Modi chu Indian prime minister zinga Ukraine tlawh hmasa ber ni bawkin, India chuan Russia nena inzawmna thuk tak an neih lai reng a ni tho bawk a, khawthlang ram te chuan Modi zin chu an ngaihven em em thung.
Michael Kugelman, director of the South Asia Institute, Wilson Centre think-tank, Washington chuan Modi zin hian India strategic autunomy a tichak zual ang a ti thung a. “India hian Western power te nena remna a zawng lo. Modi zin hian Indian interest bak a ngaihtuah lo va, Kyiv nena inthianthatna indona karah kalpui zel a duhna lantirna a ni” tiin a sawi.
Chutihlaiin US chuan Modi-a’n Moscow a tlawh chu na taka a sawisel tawh niin India chuan Ukraine indonaah Russia chu lang hrakin a la sawisel ngai miah lo bawk a, chu chu Western powers ten an lawm lo hle bawk.
Delhi chuan territorial integrity leh sovereignty humhim leh inzahsak chu thupuiah a neih a ni a, Ukraine indona tihtawp a nih theih nan diplomacy leh dialogue aupuitu a ni bawk.
Kyiv a tlawh avangin Modi chuan Russia a bansan dawn tihna a ni lo va, US leh Western nation te chuan Delhi dinnaah chiangin Moscow nena an inlaichinna chu tun hma ata tawh tih chiangin New Delhi chu Moscow military equipment a thuk taka innghat a ni tlat bawk.
India chu khawvela arms chawlut hnem ber niin a defence pawimawh te chu ram dang atanga a chawkluh a ni a, tun hnaiah erawh ram chhungah ralthuam siam beihpui a thlak thung a, tichung chuan a defence equipment 50% chu Russia atanga a chawkluh a la ni tho.
India chuan Russia tangin oil man tlawm zawkin a chawlut reng bawk a, khawthlang ram tena Russia an hrekna chu remchangah la in man tlawm takin oil a chawlut reng a, nikum khan India chu Russian oil chawlut hnem ber ram a ni.
US leh a allies te chuan Ukraine indonaah India chu a dinna sawi chiang tura an phut chungin India chuan tawngkam a nei duh thak lo bawk. Khawthlang ram te chuan India chu China lian zel tur dan nana pawimawhah an ngaih avangin an uksak lo thei lo bawk si. Chumai bakah India chu khawvela economy lian ber pangana a nih bawk si avangin a market lian tham tak te chu sumdawnna kalpui nana an mamawh a ni bawk si a ni.
Kugelman chuan India in Ukraine a tlawh chu Khawthlang ram te lawmna tur ani tia sawiin Delhi chuan Moscow a thlawp bur lo tihna a ni a ti bawk a.
India chuan khawthlang ram te nena inzawmna tha a duh a, a bik takin US nen a ni zual a, chuvangin Moscow a tan bur thiang lo tiin Eric Garcetti, US ambasador to India chuan tun hnaiah a sawi bawk.
India chuan Khawthlang ram te chu a Asian rival China dan nan a mamawh tho bawk a. Tun hnaiah Moscow leh Beijing te chuan inzawmna tha zawk an siam bawk si a ni. Chutihlaiin Delhi chuan Moscow chu a tul huna China nawr theiah a ngai bawk si a ni.
Chutihlai Ukraine chuan Modi chu Moscow tlawh zo hlim hlawl pawh ni se an be chhe dawn chuang lo bawk a. Tichung chuan Zelensky chuan Modi a sawiselna chu a tim dawn chuang lova ngaih a ni.
Moscow pawhin Delhi in geopolitics a multilateral approach a kalpui zia hria in Modi an Kyiv a tlawh chu a sawisel miah dawn lo tih a ni bawk.
Non-alignment policy piah lamah Delhi chuan Ukraine tlawhah tum dang a nei tia sawi niin India chuan tun hnaiah Europe nena inzawmna thuk zawk neih duh a, a bik takin Central leh Eastern Europe te nen a nizual bawk.
Delhi chuan big four- UK, Italy, Germany leh Frane te nena inzawmna nghet tha a duh a, chutihrual chuan Europe ram dang te nen pawha inzawmna tha zawk a duh bawk.
Modi hian Ukraine hnuah Poland tlawh leh dawnin kum 45 hnua Indian PM Poland tlawh leh hmasa ber tur a ni dawn a, July thla pawh khan Austria a lo tlawh trawh bawk.
India chuan Central European ram te nena inzawmna thukzawk neih duhin chu chu nakin zelah Delhi tana tha tura ngaih a ni a. India chuan intergovernmental organisation – Iceland, Liechtenstein, Norway leh Switzerland te nen European Free Trade Association investment deal an lo siam tawh bawk.
Chuvangin Modi an tun hnaia central leh Eastern Europe a tlawh hi Central European state te nena bilateral political, economic leh security ties tha zawk neih a duh vang a ni, tiin foreign policy analyst C Raja Mohan chuan a sawi.