Princess of Wales Kate Middleton a cancer

Kumin January thla khan a pum an zai a, tunah chuan Princess of Wales, Kate Middleton, kum 42, chuan cancer natnain a tlakbuak ve thu a puang ta a, “Tunlai chu hun khirh tak kan tawng ve a ni,” a ti.
Kate-i chuan a natna chungchang hi amah ngeiin puan chhuah tha a tih thu sawiin, March ni 22 khan video message a tichhuak a, “He hun hi hmang tangkaiin, min support-na thu lawmawm tak tak leh ka inzaina dam leh tura ka inenkawl chhunga min hriatthiam puina te avangin keimah ngeiin lawmthu hrilh che u ka duh a ni. Tun thla hnih khat chu kan chhungkuain hun khrih tak kan tawng ve a ni,” a ti.
Kate-i chuan, “Mahse, min enkawltu medical team tha tak ka nei a, a lawmawm tak zet a ni. January thla khan London-ah ka pum zai a ni a, a tirah chuan cancer ni lo tura ngaih a ni a. Inzai pawh a hlawhtling hle,” a ti a, mahse, a cancer tih an hrechhuak ta a, Kate-i chuan, “Chuvangin ka medical team ten preventive chemotherapy la turin thurawn min pe a, tunah hian treatment kan tan vel mek a ni. Kan thiltawn hian min barakhaih hle a, William nen pawh kan chhungkaw tan a tlanthan lo thei ang bera kalpui a ni. In ngaihtuah thiam mai ang a, inzaipui tawk chu dam leh turin hun a duh ve deuh a, chuvangin treatment pawh kan tan har ta a ni. Mahse, a pawimawh ber chu George, Charlotte leh Louis (an fate) hnena engkim hrilhfiah te pawh a harsa ve hle a ni,” a ti bawk.
Kate-i hian a englai nge cancer tih erawh a sawi lo va, mahse, nitin that lam a pan zel niin a sawi a, “Ka kianga William lo awm hi min thlamuantu leh chakna min petu tha ber a ni. Chutiangin min duhsakna, support-na leh ka chunga inthatna zawng zawngte hi kan tan a hlu em em a ni,” a ti.
Kate-i chuan a message khar nan hetiang hun khirh an tawh lai hian an chhungkaw privacy zah sak turin a ngen nghal a, cancer natnain a tlakbuak te fuihna thu a sawi tel nghal bawk a ni.