Printing & Stationery-in academic session tan hma in textbook peih

Printing & Stationery-in academic
session tan hma in textbook peih
Sawrkarin academic session tan hun a sawn hma thut chungin Directorate of Printing & Stationery chuan school textbook an peihfel hman vek a, district tinah an thawnchhuak kim tawh tih an sawi.
Academic session 2026- 2027 atana State Council of Educational Research and Training (SCERT) buatsaih school textbook siam leh sem chhuah hi Department of Information & Public Relations, Printing & Stationery hnuaia Directorate of Printing & Stationery kuta awm niin, school textbook quality siamthat kawnga ruahmanna thar an siam a. Textbook cover lamination pawh tih tel niin, hei hi a hmaa tih ngai loh, a senso san phah deuh mah se, zirlaite tana hman tlak leh daih rei zawk tura ngaih a ni tih an sawi.
Directorate of P&S hotute sawi danin, academic session thar atan textbook print order hi SCERT atangin 2025 kumtawp lamah an dawng a. Soft copy final hi kumin kumtir khan peihfel a ni.
Hetihlai hian academic session hi April atangin March 23-a sawn a nih tak avangin, school tan hma ngeia textbook siam zawh hman a ngai a. School luh hun sawn hma a nih tak avang hian a hma lama school textbook peihfel tumin chak takin hma an la a. Hun chep tak karah dummy copy siam, proof reading, correction leh tul dangte rang taka thawkin, textbook print, binding leh lamination hna zawng zawng session tan hma in an zo fel hman tih an sawi a ni.
Academic session tan hmain textbook hi Samagra leh textbook dealer-te hnena hlan nghal vek niin, district zawng zawnga zirlaite hnenah sem a nih theihnan district tinah heng zirlaibu hi thlen hman vek a ni tih an sawi bawk.