Private bank ten sum an theh chhuak tha duh lo – Larsap

Mizorama private bank lian rawn lut ten sawrkar atanga sum hlawm an dawn tam ang aiin sawrkar scheme pawimawh kalpui kawngah sum an thehchhuak tha leh duh si lo niin larsap Dr Hari Babu Kambhampati chuan a sawi.
Thawhtanni khan Khadi & Village Industries Commission (KVIC) hotute Raj Bhavan-a a kawmnaah he thu hi sawi kaiin, sawrkar bank thenkhat – Mizoram Rural Bank, State Bank of India leh Mizoram Cooperative Apex Bank ten KVIC hnuaia scheme kalpuina’n beneficiary te chhawmdawlna sum hlawm – margin money an pe chhuak tha nia a hriat thu larsap hian a sawi a. Hetih rual hian Mizoramah private bank tam tak an lo lut a, sawrkar atangin sum hlawm lian pui pui deposit an dawng teuh a, sawrkar scheme pawimawh tak tak kalpuina atan sum an thehchhuak tha duh leh si lo chu thil dik a ni lo, tiin, private bank te pawhin tan la se a duh tih a sawi a ni.
KVIC hotute chu an hnuaia scheme hrang hrang kalpui a nih dan a zawt a. Chak zawka kalpui dan tur leh heng scheme chhawr tangkaitu an pun zel dan turte a sawipui. KVIC State office deputy director Ashish Modak hnen atanga Khadi Vikas Yojana (KVY), Prime Minister Employment Generation Program (PMEGP), Gramogyog Vikas Yojana leh SFURTU scheme hnuaia hmalakna kalpui mek, hmasawnna leh hmachhawp te ngaihthlak a nih hnu ah sawi ho a ni.
Larsap chuan KVIC hnuaia hmalakna chu chak zawka kalpui a tul hle tih sawiin, KVIC kaltlanga thingtlangmite tana eizawnna tur siamsak, sumdawnna tenau hmanga bul tan duhte tanpuina scheme leh a dangte chu mipui tam zawkin an la hriat loh avangin KVIC hotuten media chakna an hmanthiam a ngai, tih a hrilh. KVIC hotute chu an beneficiary te hnenah an hlawhtlin theihna tur trade thlanpui thin tur leh Mizorama hmanraw tam deuh behchhan industry sawimawi thin turin thurawn a pe bawk.