Speaker sawi – nuai 100 ziah ral chhui turin Lokayukta ngen

Assembly speaker Lalrinliana Sailo in deputy chief minister department chanah cheng nuai 100 chuang ziah ral awm nia a sawi chu chhuichian sak turin Congress Thalai chuan Lok Ayukta an ngen.
Lok Ayukta chairman hnena thu thehluhah hian, Mizoram Legislative Assembly speaker Pu Lalrinliana Sailo USA zinin Maryland-a Zofa awmte nen an inkawmnaah deputy chief minister Pu Tawnluia department hnuaiah hnathawh awm looin cheng nuai 100 chuang ziahral a awm thu chief minister Pu Zoramthanga leh deputy chief minister thutdun lai ngeiin a hrilh tih a sawina video, Youtube lama an dah chu an lo hmuh ve thu a sawi.
‘He video-a speaker Pu Lalrinliana Sailo thusawi atanga a lan danah chuan, kumin January 30 khan MNF minister leh MLA zawng zawngte an inhmuhkhawmnaah CM Pu Zoramthanga leh deputy CM Pu Tawnluia te thutdun laiin, speaker Pu Lalrinliana Sailo hian deputy CM department chan hnuaiah cheng nuai 100 chuang a hmanna awm loa department hnuaia thawk la naupang tak pakhatin a kut ngeia JE pakhat awm laia hrehawm ti taka a ziahral thu a hrilh tih speaker hian a sawi a. He thil thleng hi tha a tih loh em avangin an department chan pawh en uluk tawh turin a hrilh hial tih a sawi a ni,’ a ti.
State Assembly speaker meuhin deputy CM department chan hnuaia diklo taka a hmanna awm loa cheng nuai 100 chuang ziahral a awm thu a sawi thil serious tak, Mizoram sawrkar sum a hmanna awm loa ziahral hi chhuichhuah sak tur leh a tul anga hma laksak a, thil ti dik lotu chungah dan anga action laksak turin an ngen tih an sawi a ni.