Pro League Hockey: World No 3 Australia barakhaihtu India

Lalremsiami lansarhna India women hockey team chuan tunhnaia an hneh loh zawn awn awn world number three Australia lakah Inrinni khan sikhat faiin hnehna an chang a; Rourkela khaw inkhela mualneitu team chakna goal awmchhun hi minute 34-a Vandana Katariya hlapluh niin, he tournament-a India chak vawihnihna a ni a, nizan result tarlan hman loh home leg final match-ah tunhnai thoa Bhubaneswar khaw lama an ngam loh USA an hmachhawn zui leh.
World number nine India hi tun chawlhkar liamta ni lo a hma leh chiah chawlhkarah khan sithum faiin Australia hi Bhubaneswar khuaah an hneh lo a, Inrinni Rourkela game-ah pawh khan home team ni bawk mah se rinkai lo zawk an ni leh ngei a, mahse, an goal khat tihluh bakah captain leh goalkeeper ni bawk Savita Punia chetthat zar zoin hnehna an chang nawlh a, India nulate tan result lawmawm a tling.