Pro Volleyball hmeichhia: A lerah Luangmual
An tum ram hnaih zelin Luangmualin Inrinni tlai Tata SK 712 Pro Volleyball League-ah 3-0-in Durtlang an hneh a, vawi li chak zawnin, table chung berah an luah.
R. Dengthuama Indoor Stadium, Mualpuiah awlsam taka set hnih an lak zawn hnuah team inthlau an nihna lantir zuiin, 25-8, 25-9, 25-17-in Luangmual an chak.
Kum 2019-a Durtlang champion-pui tawh Lalmuanpuii’n a club hlui lakah tum hnih tisualin point 12 a hlawhchhuak a, D3 Business Player of the Match lawmman a dawng. A kawppui Nipa Barad chuan vawi 20 vaw tlain point ruk a hloh a, Durtlang player-te’n an el pha lo.
Kai thar Luangmualin Pro Volley-ball an khelh hmasak berah team dang tan ralkhel dar an khawng ri ring telh telh. Chiang taka set khatna an lak hnuah 16-9-a hma an hruai zui laiin Zoliansangi’n a service a, point kua hmu zawnin an tlang.
Durtlangin reilote chung dinhmun tha luahin set thumna tir lamah Lalpekhlui’n tha pangngai takin a vaw tla a, 6-1-in an sang zawk a, mahse, an innghahna ber Peki’n an inkhelh chhungin point sarih a hmuh let chiah point 14 a hloh.
Luangmualin an nawrlet hnuah kum lam naupang rual awm khawmna Durtlang an bet zui leh nghal a, league kal mekah vawi li tlawm zawnin, semi-final lut pha loin an tla dawn tih a chiang nghal. Chhiatna dang, kum li kal taa an champion hnuah chak ni hmel hmu lovin Pro Volleyball khelh sarih an tlawm zawnna a ni bawk.
Khelh khat la nei mah se a sang pahnih zingah Luangmual an tel dawn tih a chiang a, an aia vawikhata khel tlem Kanan aiin point 3-in an sang. June 22 hian tun season-a trophy pahnih la tawh leh an elpui ber Kanan nen intawngin league an khar ang.
Pro Volleyball hmeichhia: A lerah Luangmual
Get real time updates directly on you device, subscribe now.
Prev Post