Tuipuiralin semi-final an lut

Tuipuiralin semi-final an lut
Anurag Rawat chuan vawi 50 chuang vaw tlain Tuipuiral point hmuhpui mah se Inrinni zan Tata SK 712 Pro Volleyball League-ah 3-2-in Hunthar an chak a, semi-final an lut.
R. Dengthuama Indoor Stadium, Mualpuiah Hunthar an chesual thui teuh hle a, awlsam taka set an lak hnuah an inthlahdul.
Tuipuiralin set hnih an la zawnin an chhanglet a, mipui beisei loh thil an thlentir. A kawtawpa tangin team tha zawk Hunthar an kir leh hram a, 25-13, 26-28, 14-25, 25-18, 15-10-in an chak.
Set la lo leh el pha loa TNT an hneh loh rualin Tuipuiral spiker Anurag chuan hnual takin khelmual a chhuahsan. Hunthar hmaah erawh chungchuang takin a theihna a lantir a, point 54 ngawt hmuin 23 hloh mah se hnehna rim hre phakin Tuipuiral a chawikang.
Anurag hi Pro Volleyball inkhel vawikhata point thawkchhuak tam ber a ni nghal a, set hnih a lakpui avangin kaithar Tuipuiralin a vawikhatna’n point an hmu a, a team chakpui loa vawithum a khelh tawhah a tumhnihna’n D3 Business Player of the Match a ni thei.
Season kal mek inelna vawihnih awm tawhah Hunthar an champion ve ve a, league an khelh hmasak vawihnihah chak zawn chungin Tuipuiral hmaah inkhel tir lam an thunun a, chiang takin set khatna an la.
Set la zawn thei turin an sang chho char char a, player thenkhat tan hun tha siamsakin Punjab atanga an lakluh Gagandeep Singh telin an thlak hlawm a, ngai an awh zui lo.
Chuti chungin 24-11-in an sang a, tlang mai tura ngaih an nih laiin Anurag chuan hmun awlah dahin Tuichangral a fuih phur a, an pawtthla. 24-24 ni chhoin vawithum an deuce a, Delhi tlangvalin vaw tla zawnin lehlam inpumkhatna an thiat.
A hma leh hnunga a awm lai pawhin Tuipuiralin feet 6 leh inchi 5-a sang Anurag-a hnenah ball pek an thulh lo a, dan theih loha a hlap tlak zel avangin team pum puiin ngampa leh nuam ti takin an khel. Huntharin player thlaklet leh mah se an talbuai nasa a, set thumnaah point 14 chiah an hmu ve hman.
An inkhelh chhungin KC Laldawngzela’n point sarih hmuin tum nga a tisual a, Tuipuiral tan Anurag thlawp thei ber a ni. Mizo player dangin awmze nei thamin danglamna an siam phak lo a, mimala innghat an nih avangin tlo taka khelh reng an harsat.
Tlawm thei dinhmun derthawngah Hunthar tlulut ve thungin, league kal meka point an hloh hmasak ber leh set hnih an hloh zawn vawikhatna a ni a, a kawtawp atangin an inphuar khawm thar leh a, an khelh thin dan lantir lehin, tute pawh rin tlakin an inlan.
Gagan chuan point 22 a hmuh zatve hloh mah se a tawp set hnih an khelh chhungin Lalnunfela leh Zomuansanga nen chiang tak takin an vaw tla. Zuang nasa leh rim taka khel Anurag-a hlap an dansak fo bakah a khat tawkin a tisual ve reng bawk a, an innghahna a tlakhniam rualin Tuipuiral an hnungtawlh.
Hunthar setter Remsangzuala’n duhthlan tur a ngah a, tawnhriat nei tam Lalramnunfela leh Lalden-sanga’n an ball hmuh an chhawrtangkai. Tuipuiralin set ngana thlengin Anurag bak ball pek ngam an nei lo a, set lina tir lam atangin lehlam nih rual phak loin a umtuah an tang tluan ta a ni.
Fela leh Zomuana’n point 10 chuang thawk-chhuakin, Rama leh Densanga’n point kua ve ve an hlawh a, 2017 leh 2018 champion Hunthar chakpui mah se inenfiahna tur leh zirlai pawimawh a ni tel. Pahnihnaah an insawhnghet a, June 21, Nilaini zanah hmahruaitu leh an elpui kumhlun TNT an tum ang.
Chak zo lo chungin Tuipuiralin rahbi thar an tuk a, chak thei thinlung thar pu chungin June ni 20, Thawhlehni zanah khelh li an tlawm zawn avanga hnuhma chhiain a tlakbuak mek Durtlang North an hmachhawn dawn a ni.
Inrinni zan match-ah hian D3 Business Fan’s of the Night atan Laltlanhlui (Hunthar) thlan a ni.
Tlawm duh lo TNT
Vanlaltanchhana leh Laldinchhunga’n Thutak Nunpuitu Team tanpuiin Zirtawpni zanah 3-1-in Chhinga Veng Spikers an hneh a, Tata SK 712 Pro Volleyball League hmahruaitu an nihna an sawhnghet.
R. Dengthuama Indoor Stadiumah TNT-in chona tling inkhel an hmachhawn a, dinhmun harsaah Chhinga Veng aia insiamrem awlsam zawk an nihna chhawrin 25-20, 17-25, 25-22, 25-23-in an chak.
Valbuanga’n point 22 hmuin a zawnin tum li D3 Business Player of the Match a ni a, Dinchhunga nen an thawhchhuah belh khawmin 40 a chuang a; league vawi li an khelh tawhah TNT an chak vek.
Tuichangral an hneh tuma Zosangzuala nena an awltir Tlangsam spiker Dinchhunga’n vawi 19 vaw tlain, Valbuanga aia point khata hloh hnemin tum kua a tisual a; set thumna an lak theihna’n a thawhhlawk a, a hnung atangin a hlap thla nual.
Khelh hnih chak zawn chunga khel Chhinga Vengin set khatna laihawlah an insawrbingna an hloh a, TNT rinrawl Valbuanga’n chet harsat ve tho mah se Sadraka Fanai leh Dinchhunga’n team awinungin, 20-16-a sang zawk an nih hnuah harsa loin an tlang.
Set hnihnaah Chhinga Vengin inkhel an tidanglam ve thung a, chungnung taka inlan Javed Khan chuan lehlam banpharna chung atangin a hlap thla fo a, veikhawr Lalbiakmuana’n tha takin a thlawp bawk a, TNT talbuaiin an khinglet zo lo.
TNT an hnungtawlh rei duh lo. Set thumna tan rualin an insiamrem nghal a, Javed-a vuak an dan hnuah K. Lalfakawma hlap an dang tla leh a, 5-1-in hma an hruai. Valbuanga’n a tanhmun siamthain a zia a chhuah bakah Dinchhunga nen hlawk takin an khel a; Spikers-in hnaih leh hman mah se 23-21 a nih hnuah Kawnpui tlangvalin tum hnih vaw tlain TNT a tlangpui.
Harsa loa set thum la zawn thei turin TNT-in inkhel an thunun zui a, set linaah 16-12-a sang zawk an nih hnuah 22-17-in hma an hruai leh. Chhinga Veng intuaithar ve lehin hun pawimawhah point nga an hmu zawn a, an nih rual leh hman.
23-23 a nih leh hnu boruak sangah Val-buanga’n vaw tlain, Spikers-in chhanglet ve leh nghal tura hun tha an bawhpelh a, Zosangzuala’n deuce ngai loin TNT chakna point hlu tak a thawkchhuak.
Set hnuhnung pahnihah Chhinga Vengin an hnaih hle a, an inthlauhna a tam lo. Rajasthan atanga an lakluh Javed an chhawr rim a, point 29 a hmuh laiin 19 a hloh a, a tihsual ngahin team a nghawng.
Biakmuana’n point li hlohin 14 a hmu a, PC Lallianmawia’n vawi 10 a vuak tlak laiin point hnih paih a, tum danga khel tha thei tak Faktea erawh talbuai tluanin, vawi hnih chiah tidikin point ruk a paih.
Chhinga Veng tan semi-final beiseina a bo chuang lo a, khelh hnih an la neihah vawi khat an chak chuan an tlang dawn chiang a, zaninah Tui-changral nen an inhmachhawn leh ang.
Semi-final lut chiang sa tawh TNT-in chak fai vek tumin Nilaini zanah league an khel zo dawn a; an elpui kumhlun Hunthar nen intawngin Mizo hlanga champion hmasa ber nih an tumna kawngah fiahna a ni nghal ang.