‘Project: Chawlhna Krista (Chris M.S Dawngkima Hlate)’ a chhuak hnai ta

‘Project: Chawlhna Krista (Chris M.S Dawngkima Hlate)’ a chhuak hnai ta
Zaithiam leh zaipawl hrang hrangin Chris MS Dawngkima hla an sak dahkhawmna music video ‘Project Chawlhna Krista (Chris MS Dawngkima Hlate)’ tih chu tlangzarh turin an peihfel ta a, episode hnih a thenin, Episode 1 hi April thla chawhnu lamah tihchhuah a ni ang.
Zaithiam leh hlaphuah thiam, Chris MS Dawngkima hian Pathian fakna hla eng emaw zat a lo phuah tawh a, ‘Project Chawlhna Krista’-ah hian gospel singer hriathlawh tak tak Zoramchhani, Cindy Lalthanpuii, Stacy VL Muanpuii, R.Lalrinmawii, Melody Lalzirliani, Steward Lalrochama, Is-a Pachuau, Isaac Hnamte, Zorinsanga Sailo leh Samuel Lalmuanchhana te bakah Ramhlun North Pastor Bial Zaipawl, The Leprosy Mission Choir, Peace Choir leh JB a cappella ten Chris-a hlate hi an sa a, backing vocals lama hriathlawh Rita Renthlei te unauin an pui a, musican H Laltanpuia (bassist), Hmangaihkima (guitars), Lalchhanhima Khiangte (guitars), K Lalremsanga (keyboard), Vanlalhriatrenga (drums), Lalengmawia (harmonica) leh Ester L. Khiangte (violin) te nen an thawkho bawk a ni.
Project Chawlhna Krista atan hian organising committee dinin, Chairman David Zodintluanga leh Secretary VL Thuneia te kaihruainain 2024 kum tawp lam atang khan hma an la tan tawh a, March ni 14 khan Convention Centre, YRC-ah Programme Coordinator Lalnunmawia kaihhruaiin live shooting an nei tawh a, PC Zonuntluangi’n host-in Chris-a hla 22 music video chu tihchhuah turin an puitlin thei ta a ni.
Project Chawlhna Krista-ah hian Chris-a hla hlui 12 bakah a hla thar 10 dahin, audio post production hi EFX Audio kut a ni a, live shooting an neihnaah hian Active Sound ten recording tiin, Brigter Co.-in stage set up an buaipui a, music video hi M-Space kutchhuak a ni thung ang a, hla 22 hi episode hniha thenin, a episode hmasa zawk hi April thla chawhnu lama tihchhuah an tum tawh dawn a ni.
Project Chawlhna Krista organising secretary VL Thuneia chuan he project hi Mizo irawm chhuak ngei Pathian fakna hla tha tak tak chhawpchhuah leh midang te cho phurna bakah gospel music kaihthawh thar zelna leh Chris-a hlate dahthatna ni pahfawma an buatsaih a nih thu a sawi.