Provincialisation ngaihtuah that tum vangin MIGAMSTA an lawm

Sawrkar lam aiawhten school provincialisation ngaihtuah that tum a ni tih an sawi avangin an lawm tih Mizoram Govt. Adhoc Aided Middle School Teachers’ Association (MIGAMSTA) chuan an sawi.
MIGAMSTA thuchhah chuan, anmahni leh Mizoram Govt. Adhoc Aided High School Teachers’ Association (MIGAAHTA) hruaitute leh sawrkar aiawh adviser to chief minister Pu Lalmuanpuia Punte kaihhruaia ZPM PAC member-te nen an inbiaknaah, sawrkar aiawhte hian middle school leh high school provincialisation chu kalpui tum leh mek a ni a, kar thar, Thawhlehniah hian hemi pual liau liauin Council of Minister thutkhawm a ni dawn tih an sawi chu lawmawm a tih thu a sawi.
Inbiaknaah hian zirtirtute chuan thingtlang khaw lian lo tak tak leh mihring cheng pawh tlem zawkna thlenga fun kim thei tura school provincialisation kalpui tul an tih thu an sawi tih MIGAMSTA hian sawiin, sawrkar leh a bikin chief minister, School Education minister leh ZPM PAC member-ten theihtawp chhuaha hma an lakpuinaah lawmthu an sawi a. An zarah Council of Ministers thutkhawm turah pawh harsatna nei loa an chungchang thu a tha zawnga a her chhuah an beisei tih a sawi a ni.
Zirlaite hmakhua ngaia provincialisation an nawr kawnga hmalakpuitu zawng zawng leh a bikin khawtlang mipui, all NGO, School Managing Board leh VC/LC chungah pawh an lawm hle tih a sawi bawk.