Karliamta Nilaini zan Uefa Champions League round of 16 second leg-ah Bayern Munich hneh lo lehin, Europe club inelna lian ber atangin pet-chhuah an ni a, a hma chiah tualchhung league lamah tlawm bawkin, hun chhe tak hnuaiah Paris St-Germain chuan kartawp Inrinni zan khan Ligue 1 hnehna changin, Brest mualah 2-1 hnehna an sual-chhuak ve leh ta hlawl!
He inkhela PSG hmahruai-na goal hi minute 37-a Carlos Soler tihluh niin, Kylian Mbappe ‘shot’ dansak a nih hnuah Soler hian hun remchang hmuin ‘pressure’ sang fuin a tuam mek mikhual team tan a khung.
Chawlhlawk dawnah rinloh takin Honorat chuan Del Castillo thawhrah atangin team talbuai mek Brest siphurh sutna goal a khung ve nawlh a, team pahnih hian 1-1 score nen half time chawlh an hmang.
Paris Saint-Germain hi an chak zo lo leh takngial dawn nia a lan hnu minute 90-ah Lionel Messi siamsak atangin Mbappe chuan mikhual team chakna goal a tilut a; he result nen Paris club hian Ligue 1 table-ah point 11-in hma an hruai fal.
Chak mamawh Paris St-Germain hian an nawr na hle a, inkhel hun tam zawk thu-nunin, shot ngawt pawh tum 17 tehreng an nei a; tlakhniam hlauhawm dinhmuna ding mek Brest lamin shot vawi sarih nei ve bawkin, tun dinhmunah point khatin ‘relegation zone’ an lut lo chiah chiah.
French champion PSG hnuai chiaha pahnihna luah mektu Olympique de Marseille an chak ve leh chuan league hmahruaitute pahnih inthlauhna hi point riatah bawk a chhuk leh ang.
PSG chak ni herchhuak!
Get real time updates directly on you device, subscribe now.
Prev Post
Next Post