PSG chakpuitu Messi
Kan hnung lawka Paris mipuiin an team chak lo khelmual chhuahsan tur an boo khum zanah Lionel Messi pawh an aunawmnah tel a, Inrinni zan League 1 lamah goal khat thunin Nice mualah sihnih faiin Paris St Germain a chakpui a, game khat a khelh that loh hnuah Argentina playmaker chu a club tan a che hero leh nghal.
First half minute 26-a Nuno Mendes siamsak atangin Messi hian mikhual hmahruaina goal leh season kal laia a league goal 14-na ni nghal a tilut a; second half minute 76-ah Argentina captain hian Sergio Ramos-a goal tur chhawpsak zui lehin, an chhuahvahna lama an point thum humhaw leh nen Paris St-Germain hian La Liga table-a an hmahruaina an sawhnghet sauh a, anmahni hnaihbertu Lens lakah point rukin an fal ta.
PSG keeper Gianluigi Donnarumma a chetha a, first half chhungin Hicham Boudaoui leh Nicolas Pepe goal thun tur pui taka dansakin, Nice captain Dante pawhin ball tlahlang nangfuhin mikhual goal lamah a chhuih a, goal kham perin, goal kham a fuh zui bawk.
Youssouf Ndayishimiye pawhin mualneitu team tan goal thun theihna hun remchang hmu bawk mah se penalty area kilsir atanga a chhuih chu rang taka chein Donnarumma chuan a nampersak hman bawk.
PSG hian Ligue 1 season hnuhnung hnaivai 10-ah title vawiriat tehreng an hui tling a; season kal laiah pawh hian champion tura rinkai ni leh mek bawk mah se an talbuai zauh a, league match hniha an tlawm hnuah kartawp khan hnehna an lawm leh thei ta a, Lionel Messi bawk a langsar leh ta ber a ni.
Inrinni inkhel dangah Angers pawhin sikhat faiin an mikhual Lille an hneh ve bawk a, table-ah pangana an luah.
PSG chakpuitu Messi
Get real time updates directly on you device, subscribe now.
Prev Post
Next Post