City in Arsenal an hnaih

April 8, Inrinni zan khan English Premier League 2022-23 khelh chhunzawm a ni a. Manchester City chuan 4-1 Southampton sawpin hmahruaitu Arsenal an hnaih leh zual. Inkhel dangah Manchester United leh Tottenham in hnehna an chan laiin Chelsea an tlawm ve thung.
Dal theih loh Haaland
Hliam vanga Norway leh Manchester City tan a inlan theih loh zauh hnuin Erling Haaland a dam a, inkhel a hmachhawn leh thei tawh. Pahnihnaa awm mek City in table mawngphah Southampton an hmachhawn tumin Haaland hian goal hnih a thun a, a goal thun tur dal thei an awm lo. City manager Pep Guardiola-a’n la chhuak hma lo se Haaland hian hattrick a siam ngei tura ngaih a ni. Hartrick puitlin em lo mah se Haaland hian EPL record thar a siam ta tho thung.
St Marry’s ah tlakhniam pumpelh tumin Southampton in tan an khawh a, an mikhual City lakah an khel chhe lem lo viau. Minute 45-naa Haaland-a’n hmahruaina goal a tauh luh hma zawngin Saints hi hlauhawm zawkah an tang a, a tawp an khar that theih loh vangin goal an thun thei lo thung. Chawlhlawk hmain goal lut a awm dawn lova a lan hial hnuah Kevin de Bruyne siamsak tha tak chu Haaland chuan a tauh goal a, City in si khat faia hmahruai chungin chawlhlawk an hmang.
Chawlhlawk hnu lamah City an khel tha chhunzawm zel a, goal an thun belh thuai. Minute 58-ah Jack Grealish chuan an goal hnihna a thun. Si hnih faia hma an hruai hnu hian thil mawi, mak leh ropui a thleng zui a. Minute 68-naah Jack Grealish siamsak tha tak chu Erling Haaland chuan pui zetin a pet (bicycle kick) goal a, an goal thumna a thun. Haaland hian EPL-ah goal 30 a thun tling chiah a, EPL-ah goal 30 thun tling rang ber record thar a siam nghal. City goal hnihna a thun thun lawkin Haaland hi lakchhuah a ni a, hahdamtir a ni.
Haaland awm lo mah se City in goal thun an thulh chuang lo. Minute 75-naah Kevin de Bruyne penalty hlawhchhuah chu Haaland thlaktu Julian Alvarez-a’n a pet goal a, an goal lina a thun. Si li fai ngawta an hnufual hnuin Southampton tan Sékou Mara chuan minute 75-naah an goal neih chhun thunin an si phurh a sut then a. Hemi hnu hian goal dang a luh belh tawh lo.
Southampton laka point thum an hmuh hmangin City hian hmahruaitu Arsenal nen an inkar an tizim a, Gunners an phak lohna hi point nga chiah a ni tawh. Arsenal hian nizan khan fiahna hautak hmachhawnin, Anfield-ah Liverpool an hmachhawn a, Reds an hneh a nih chuan City nen an inkarah point 8 a tla zep nawn leh a. City in champion beiseina sang zawk an neih laiin Southampton dinhmun a chhe leh zual thung a, Saints hian table mawngphah an luah nghet a, tlakhniam an hnaih zel.
Result dang
Inrinni zana inkhel hmasa berah Manchester United chuan Old Trafford-a an mikhual Everton chu si hnih faiin an hneh a, palinaah an insawh nghet. United goal hnih hnih Scott McTominay leh Anthony Martial te thun a ni.
Season kal meka khel tha tak Newcastle chuan Gtech Community Stadium-a an khingpui Brentford chu 2-1 in an hneh a, pathumnaah an insawhnghet ve bawk a. Magpies hian top 4 huang luah season khar ngei tumin tan an khawh zui ang.
Champions League khelh phak tuma tan khawh mek Tottenham pawhin an mikhual Brighton chu 2-1 in an hneh ve bawk a. Newcastle leh Manchester United te nen top 4 hhuang luah phak tumin inelna hautak an hmachhawn zui zel.
Team lian an chak sup sup laiin Chelsea chu an manager thar Frank Lampard hnuaiah an tlawm thung a. Blues hian si khat faiin Wolves an hneh lo.