PSG in Harry Kane an duh

French Ligue 1 champion Paris St-Germain chuan an tlarhma thuamchak turin England leh Tottenham striker Harry Kane an duh a. Kane an lak theihna tur a nih chuan an tih theih apaing tih vek an huam.
England leh Tottenham tana goal thun hnem ber Harry Kane hian trophy la tur leh chona thar hmachhawn turin Tottenham chhuahsan a duh a, a zawm chak ber chu Bayern Munich a ni. Bayern Munich hian Kane lak tumin vawi hnih an dawr tawh a, Tottenham nen inremna an la nei thei lo. Spurs hian an player pawimawh Kane hi £100m talin hralh an duh a. German champion hian £70m bakah pek belh leh theih turin an dawr thung. Bayern in an dawrna hi Kane mana an chhiarna zat aia a tlem em vangin Spurs hian Bayern dawrna an hnar. Vawi hnih indawr hlawhchham tawh mah se Bayern an la beidawng lo.
Beyern Munich nen inremna an neih mai theih loh vangin Tottenham hian Kane chelh theih beiseina an nei thar leh a, kar khatah £4,00,000 zet hlawh turin sawm an tum. EPL player hlawh hnem pathum zinga tel theihna hun tha nei mah se Kane hian tophy chawi a duh a, chhuah a la rilruk fan.
Bayern Munich in lak an tum a, Spurs in chelh an tum bawk laiin Paris St-Germain in Kane an ngaihven thar ve leh a, PSG hi chuan Kane lak nan sum hlawm sen hreh dawn lova, an tih theih eng pawh tih an huam hmiah. Kane la tura an inhuam thui em vangin PSG hian Bayern aiin England captain hi an ngam huai zawk ngei dawn a, UCL atanga hnawtchhuaktu Bayern hi luah lan deuh lap an tum dawn. Anni hi khawvela player manto ber ni tur Neymar leitu te kha an ni a, an duh zawngah chuan sum sen an hreh lo viau, sum sen tur an nei bawk. PSG an rawn lan leh tak vangin Kane hma lam hun a chiang lo leh zual a, EPL-ah a khelh zui aiin a khelh zui lohna chance a sang zawk viau rih.
Footballer ropui Lionel Messi chuan PSG a chhuahsan tawh a, French superstar Kylian Mbappe hma lam hun a chiang lo mek bawk. Messi hmun ruak luahtu tur player tha an mamawh a. Mbappe a chhuak a nih phei chuan Harry Kane an mamawhna a sang leh zual. Mbappe hian PSG-ah cham chhunzawm turin contract thar ziah ngei a ngai a. Contract thar ziah a tum loh vangin kawng awmchhun chu PSG chhuahsan a ni rih. Messi leh Mbappe an ch^n rual a nih chuan PSG tlarhma a kaw hawk dawn a. Forward hrawl lak luh an mamawh ang. Forward hrawl zinga langsar tak chu Kane a ni. Messi leh Mbappe an chan rual chuan PSG hian hlawha an sen thin tam tak an hum ve thei dawn thung . Chuti a nih chuan manto leh hlawh sang tak hlawh tura Kane an la lut a nih pawhin an ko a rih phah lutuk lo tura ngaih a ni.