Pathianni zanah a tir lam minute riat lek chhunga Kylian Mbappe goal hnih tihluh hmangin Auxerre mualah 2-1-in Paris St-Germain an chak a, Ligue 1 title 11 lak tlin an tumna kawnga game hnih hmabak an la neih atangin point khat chiah hmuh an ngai tawh.
Defending champion PSG hian point rukin anmahni hnaihbertu Lens an kalsan tawh a, pahnihna luahtu team hi goal difference-ah an hniam zawk bawk a, khelh hnuhnung pahnih la awmah draw chauh pawh an dinchanpui thei tawh dawn a, kartawp Inrinnia an luhkhung tur Racing Strasbourg muala tlawm an pumpelh hrim hrim chuan an title kawl lai an humhim thei tawh ang.
|an atanga minute rukna leh minute riatna leka goal hnih khung hmantu French striker Mbappe kha Ligue 1 chanchina goal hnih thun rang ber niin, Ligue 1 top scorer tura intlansiakna kal zelah a dinhmun a sawhnghet deuh deuh.
Kum 24 mi Mbappe hian season kal lai inelna hrang hranga game 41 a khelh tawh atangin goal 40 leh leh assist vawikua a nei tling tawh a; Ligue 1 bikah chuan khelh 32 atangin goal 33 a khawl tling tawh thung.
France international goal hmasa zawk kha Ruiz thawhrah atanga a tihluh niin, Messi siamsak atangin minute hnih hnuah a goal hnihna a thun zui leh.
Table-a 16-na luah mek chunga tlahniam thei dinhmuna la ding zui zel Auxerre goal neihchhun kha second half tir lam minute 51-a Lassine Sinayoko tihluh niin, he goal khat hian an dinhmun a tiziaawm pha ta chuang lo.
Christophe Galtier-a team PSG hian Ligue 1 title inchuh hnaivai hnuhnung vawi sawmah vawi riat trophy changin, season liamta khan Marseille leh Saint-Etienne hnung zuiin French title 10 la tling thei team pathumna an ni a, kumin hian all-time record an malkhalh nge nge dawn niin a lang.
PSG tan title hmin leh teuh tawh
Get real time updates directly on you device, subscribe now.
Next Post