PSG tana goal khung hnem ber Mbappe

Hun pekbelh minute hnihna a kal mek laia mualneitu team goal lina khungtu Kylian Mbappe chuan an mikhual Nantes laka 4-2-a Paris St Germain a chakpui rualin mimala mellung pawimawh a phun a, kum 2017 maia Paris club a zawm hnu game 247-a goal 201 thun tlingin, PSG player awm tawh zinga goal thun tam ber a ni ta.
Paris St Germain all time top goalscorer Mbappe club record goal thun zan hian first half minute 12-na lekah Lioel Messi chuan mualneitu team goal hmahruai thawhin, minute 17-ah Nantes player Jaouen Hadjam chuan an lam goal-ah a tilut palh a, mahse, Nantes hian Ludovic Blas leh Ignatius Ganago-te goal khat ve ve tihluh hmangin minute 38-ah an siphurh an sut zo hman.
Second half tir lam minute 60-ah Mbappe cross kal zel atangin Danilo Pereira chuan PSG hmahruai nawnna goal a thawh a; tarlan tak angin, hun pekbelh minute 92-naah Pembele thawhrah sengin Mbappe chuan PSG tana goal khung hnem ber a nihrualpui mek Edinson Cavani nena an record thawhsanin mellung chhin-chhiahtlak a phun zui ta a ni.
Nikum December thla maia kum 24 tling France forward hian World Cup-a hming a chher hnuah footballing superstar nihna kawng a zawh kal zel a; kum 2017-a Monaco atanga loan-a PSG a zawm hnuah euro maktaduai 180 lawihin contract puitling a ziak a, a heti chho ta a ni.
A club vawn lai tana record ropui a siam hnuah Mbappe hian history siam tur renga inkhel a nih thu sawi chungin, “Ka sawi fo tawh thin angin Frane ramah hian history ziaktu nih ka duh a, kan ram khawpui ngeiah hian chu thil chu puitlin ka tum tlat a, ka ti thei ta reng a; a makin a ropui a, chutih rualin hmabak tam tak ka la nei,” a ti.
Canal Plus hriatah sawizawmin, “Parisian ka nihna zawnah ka tan he thil hi a special ngawi ngawih a; hmanah khan tu emaw hian captain armband ngei mai hreng chungin record ding lai khumna goal hi ka la puitlin dawn tih min hrilh ta se ka awih hauh lo ang,” tiin a hun tawn ropui a tihzia thu hahipin a sawi.
He Frenchman la tuai tak hian World Cup final tum hnih ngawt khel tawhin, kum 2018-a trophy hlu ber a sualchhuah piahlamah nikum tournament-ah khan top scorer lawmman Golden Boot a dawng leh bawk.
France tana 2021 Nations League title la tawh Mbappe hian nikum December thla World Cup final hun pangngaia 3-3-a Argentina an draw tum khan hat-trick siamin, penalty petah South American team an ngam ta lo a nih kha.
Monaco atanga PSG-in an leina man kha rawlthar mana world-record fee niin, Paris chu Ligue 1 title a lakpui tawh bakah season liamta hnuhnung paliah khan he division-a top scorer a ni fai vek bawk!
Tun season kal laiah pawh a club tan goal 30 ngah tling leh tawhin, assist vawiriat a nei tel a; game 247-ah assist ngawt pawh hi tum 85 zet a siamchhuak tling tawh.
Inrinnia an point thum hlawhchhuah leh nen Paris St Germain hian point 11 zetin Ligue 1 hma an hruai fal tawh.