Pu Lalduhoma’m midang thusawi a ngaichang ngai lo, a mamawh lo – Zoramthanga

Pu Lalduhoma’m midang thusawi
a ngaichang ngai lo, a mamawh lo
– Zoramthanga
Chief minister ni lai Lalduhoma chu party tereuhte dina dictator taka mi hrut thang a nih avangin a chief minister hnu ah pawh midang thusawi a ngaichang ngai loa, a mamawh hek lo tih MNF hruaitu Zoramthanga chuan a sawi.
Inrinnia MNF Thalai Hqrs leh MNF Thalai Dampa East Block huaihawta Reieka MNF Thalai Dampa East Block Meet neih a hmanpuinaah MNF president Zoramthanga chuan, Pathianin an elpuite chu lalna a pe thin a, an lalna atangin an tla a, an ral thin tih a sawi.
Mizo Union, PC an lal a, an tla a, an ral vek a. Congress an lal a, an tla chu MLA ngah em em thin khan tunah phei chuan pakhat chauh an nei tawh tih a sawi. “Party tih tlak awmchhun ZPM-a an hotupa Pu Duhoma lah opposition thang, party tereuh te te din a, chuta dictatorial power-a hrut thang a ni. Midang thusawi a ngaichang ngai loa, a mamawh hek lo. Sawrkarna an chelh hnuah pawh cabinet rawn ngai ti loa mahni thu thua ti mai thin a ni,” a ti.
ZPM chu a lehpekah chuan mipuiin an tlin an ring tawh loa, kum 5 enchhin duhtute pawh term chanve hmain an inchhir tawh niin Zoramthanga hian a sawi. “MNF hian political party-a kan opponent-te hi chak takin kan suchhia in kan su tlawm ngai lo. Ngawi rengin kan thlir a, an tla a, an liam mai thin,” a ti.
Danpui Article 371(G) leh FCAA chungchang sawiin, hnam mualpho zawng leh hnam thuthlung sawinghinga kal ngat ngat chu thangtharten an huat a tul tih a sawi. Thangtharten hmabak an neih chhan chu hnam thuthlung rah a ni, tiin, hnam inhumhimna dan mausam zawnga Vaiho hnena hralh a, an duh duha an lo luhna kawng hawntu ZPM chu paihthlak a ngai a; Dampa bial mipui chu a paih hmasa bertu ni turin a sawm tih a sawi.
Dampa biala MNF official candidate Dr R Lalthangliana chuan thlan tlin a nih chuan opposition MLA pawh nise, Arthurium Festival chu Reiekah kaltir zel a ni dawn tih a sawi.