PUC-ah chemistry lam zirho

PUC-ah chemistry lam zirho
Pachhunga University College-a Chemistry department chuan ni hnih awh tur, ‘National Seminar on Recent Advances in Chemical Sciences and it’s Impact on Society 2025’ chu Ningani atang khan an hmang.
Seminar hawngtu Mizoram University finance officer Prof. Vanlalchhawna chuan kan nitin nunah chemistry a pawimawh a, a tel loin kan awm thei lo tia sawiin, ‘science laimu’ tia sawi a nih thin a, science peng hrang hrang thlunzawmtu a ni tih a sawi. Khawvelah hmasawnna tluantling leh duhthusam a awm theihnan chemistry lam zirbingna hrang hrang a pawimawh, tiin, India ramah pawh chemical leh petrochemical sector lamah eizawnna tur kawng a tam tih a sawi a ni.
Seminar thnupui sawihawngtu Dr Samuel Lalthazuala Rokhum chuan chemistry subject-a hmasawnna hrang hrangin mihring nuna danglamna a thlen dan, khawvelin a buaipui em em energy source thar siamchhuah kawngah leh environment kaihhnawih lamah pawh chemistry-a zirbingna a pawimawh tih a sawi a. Laboratory-a an thil siamchhuah thar hmanga biodiesel siam dan a sawi bawk.
NIT Silchar-a Department of Chemistry associate professor Dr Samuel hi tun dinhmunah Mizo researcher zinga citation hmu hnem ber a ni a, Mizo zinga Stanford University leh Elsevier-in “World’s top 2 percent scientist” a thlanchhuah zinga tel awmchhun a ni.
Seminar hi vawiin, February 14 hian chhunzawm a ni nanga, mithiam 22-in an research tihna atanga an thil hmuhchhuah hrang hrang hmangin presentation an pe a ni.