PUC-ah international seminar

Pachhunga University College hnuaia department pali – English, Mizo, Philosophy leh Education department tangho chuan social media-in hnam nunphung a nghawng dan zirchianna, ni hnih chhung awh tur an buatsaih a. Ningani khan Art & Culture minister C Lalsawivunga’n a hmanpui.
Minister chuan nitin nunphungah social media platform hrang hrangin bu a khuar thuk a, university leh college pawhin zirna tha zawk kalpuina atan an hmang tangkai hle tih a sawi. Khawvel changkang zelah social media chu tribal culture vawnhim kawnga tangkai taka hman thiam tum tur leh nghawng tha lo a neih loh nana theihtawp chhuah turin a fuih. “Social media chak tak hmang hian, global culture-ah kan hnam nihna phochhuak a, a tha lam zawnga hnam nun kan chawikan zel a ngai a ni,” a ti.
He international seminar-ah hian mithiam hrang hrang – Oxford University UK, Mauritius, Mumbai leh India ram hmun hrang hrang bakah Mizorama mithiam tak tak mi 36-te paper buatsaih zirho a ni.
PU College hnuaia department hrang hrang hian kumin chhungin international seminar/ conference vawi 6 an buatsaih dawn a; tun tum ami hi a pahnihna a ni.