Pachhunga University College Research Conclave 2023 chu Thawhlehni khan neih tan a ni a. Higher & Technical Education minister Dr R. Lalthangliana’n a hawng.
-- Advertisement --
PU College-in tun dinhmunah research scholar 61 an nei thei leh thlatin international research paper tichhuak (publish) thei institution a nih avangte, kum 6 kalta chhunga journal leh lehkhabu publication 750 chuang an nei theite chu ropui a tih thu Dr R. Lalthangliana hian a sawi a. Undergraduate course subject chi 23 zirna bakah post graduate zirna – Mizo, Philosophy, Life Science, Geophysics department an nei chu hmasawnna nasa tak a ni tih a sawi.
Session tharah Philosophy department-a PhD zirna tura ruahman pawh Mizoten zirna lama finna kan neih zau nan rahbi pawimawh tak a ni, tiin, principal leh faculty thahnemngaihna avangin a lawm hle tih a sawi a ni.
“Finna leh hriatzauna hi research atanga lokal a ni a, a bing taka zirna – research chuan kan nitin nunah nghawng nei lo angin lang mah se, khuareiah hmasawnna kawngah min hruai thin,” a ti.
Minister chuan PU College chu central university funded a nih angin tunhnaiah faculty thahnem tak la in, sanctioned post 120-ah 118 an hnawhkhat thei chu a lawmpui tih sawiin, faculty lak chungchangah a tam zawk, mi 100 chu PhD neisaa lak an nih avangin, thalaite zirna sang bawhzuia zir chhunzawm zel an tam tawh zia a lantir tih a sawi.
NAAC accredited A+ mai ni lo, A++ hmuh belh zel tuma tang sauh sauh tur leh research project 40 kal lai mek leh research proposal an neih zawng zawngah duhsakna a hlan tih a sawi bawk.
PU College-in tunhnaia hma an lak mekna report a ni a. Heng zingah hian adopted village-a an thlan khaw pali – Phulpui, Lungleng, Dulte leh Khawrihnima hma an lak dante sawifiah a ni. Adopted village atan hian PUC faculty-ten sum thawhkhawmin hemi atang hian life skills, college admission leh thildangah awareness campaign leh tlawhchhuah program an nei thin.
Chawhnu ah technical session neih a ni a, research paper hrang hrang zir ho a ni. Conclave hi Nilaini hian chhunzawm a ni ang.