Puk chhungah mihring ruh thahnem tak hmuchhuak

Champhai district-a Lungphunlian khaw dai, Kanghmun kham puk chhungah mihring ruhro nia hriat thahnem tak hmuh chhuah a ni.
Lungphunlian ram chhung, khua atanga hmar lam km.2 vela awm, Kanghmun puk hi feet 12 vela thuk, feet 40 vela sei, a chhunga a sang lai ber feet 18 vel a ni a. Tunhma in helai chhehvelah hian ruh them hmuh tawh thin ni mah se, ramsa ruhro ah ngaiin enchian leh ngaihven zui a hlawh ngai lo.
Kumin July 29 khan Lengteng Widlife Sanctuary hnuaia wildlife guard duty Lalropuia chu he puk chhungah hian a lut a. Mihring khabe ruh a hai chhuah hnu ah, ngal ruh, ha leh lu ruh thahnem tak a haichhuak zui a; ruhro bakah hian hlum bel, belthleng leh hmanrua atana hman thir pawh a haichhuak a ni.
Lungphunlian VC leh YMA hruaitute a hriattir nghal a. Ruhro haichhuah a nih thu hi ICFAI University Mizoram-in an hriatin, zirchian an tum thu khawtlang hruaitute an hrilh a, luh leh khawih theih loha venhim rih a ni.
Thudawn danin, Lungphunlian ram Kanghmunah hian tunhma in mi an cheng thin a, kum 1912- 1915 vel khan a khaw puma a kan avangin tuna Lungphunlian khaw hmunah hian an insawn nia sawi a ni.