Putin-a’n Kyrgyzstan tlawh tum

Vladimir Putin chuan Kyrgyzstan chu October 12-ah a tlawh dawn a, International Criminal Court-in amah manna thupek a chhuah hnua Russia ram pawn a kal leh hmasakna ber tur a ni.
Putin hian kum 2022 kumtir lama Ukraine a run hnuah ram pawn a kal lo tluk a ni a, March thlaah ICC in amah manna a tihchhuah hnuah phei chuan ram pawn a kal hriat a ni lo va, ICC-in amah manna an tihchhuah chhan hi Ukraine a naupang te dan kalha Russia rama a phurhluh tir vang tia puh a ni thung a, hei erawh Kremlin chuan a hnial thung.
“President of the Kyrgyz Republic, Sadyr Japarov an a sawm angin President of the Russian Federation, Vladimir Putin chuan official-in a tlawh ang,” tiin Kyrgyz presidential administration thuchhuah chuan a tarlang a.
Putin hian May thla khan Japarov an Kyrgyzstan tlawh tura a sawmna chu a lo pawmsak tawh a. Mahse, a hma zawng chuan Kremlin-in sawi chianna a la nei ngai lo a ni.
Russian leader hian karleh khian Belt and Road Forum neihna tur Beijing a pan dawn bawk a. Kyrgyzstan leh China-te hi ICC member an ni lo ve ve a, hei vang hian a zalen a ni.
Moscow chuan ICC puhna hi hnawl thungin Kremlin chuan Putin man tura tihna chu Khawthlang ram tena Russia an huatzia lantirna tiin an sawi thung a. Russia chuan ICC prosecutor leh judge te lakah criminal case a siam zui ve nghal thung.
Kyrgyzstan-ah hian Putin chuan Kant a air base hawn kum 20-na lawmna neihnaah a telpui dawn bawk a. He lai hmun hi Russian Aerospace Forces’ 999th Air Base a ni bawk.
Hetih lai hian Kyrgyzstan presidential office chuan Prime Minister of Armenia Nikol Pashinyan chuan Japarov hnenah Bishek a Zirtawpni atanga Commonwealth of Independent States (CIS) summit neih turah a tel loh tur thu a hrilh tiin a sawi bawk.
CIS hi kum 1991-a Soviet Union kehchhiat hnua post-Soviet Republics tena an din niin member zingah Russia, Armenian, Azerbaijan leh Kyrgyzstan te pawh an tel a. CIS meeting-ah hian Putin chuan tel a tum nia sawi a ni.
Moscow-in Ukraine a run avangin Russia-Armenia boruak a chhiat phah hle a, Armenia hian ICC jurisdiction chu zawm tur a ni an inti ve thung a.
Hei bakah hian Armenia chuan Russia chu Armenia thenawm Azerbaijan-a thla kaltaa Nagorno-Karabakh buainaah inrawlhna a neih duh loh avangin a sawisel na hle bawk a ni.
Nagorno-Karabakh chu Armenian te chen tamna niin Azerbaijan chuan tharum hmangin a chhuh a ni ber a. Azerbaijan ram a ni chungin a mi cheng tam berte chu Armenian an ni thung a.
Nagorno-Karabakh chungchangah hian Armenia leh Azerbaijan te chu an inbei na hle a. Indona nasa zawk thleng mai thei tura ngaihna pawh a awm hial a ni. Mahse, tun hma atanga Armenia tan thin Russia chuan sawi a nei tha duh ta lo a ni.
Kar kalta khan Azerbaijan’s President Ilham Aliyev chuan EU-brokered meeting neihna atangin a inhnukdawk bawk a ni.