Boris Johnson chuan Russia-in Ukraine a run hmaa Vladimir Putin nena inbiakna an neihah missile a beihah a vau thu a sawi chhuak.
Khatih laia British prime minister chuan Putin chuan ‘minute khat bak mamawh a ni lovang’ tia a hrilh thu a sawi a.
-- Advertisement --
Johnson chuan February 2022 vela hun rei tak chhung Putin nena an inbiaknaah indona chuan chhiatna nasa tak a thlen thei tia a hrilh thu a sawi bawk.
Johnson chuan Putin hnenah Ukraine a run a nih chuan khawthlang ram tena an hrek tur thu leh Russia ramri depah Nato sipai tam zawk chhek khawl a nih phah bawk ang tia a hrilh thu a sawi bawk a.
Hei mai bakah hian Russia-in Ukraine a beih loh nan Putin hnenah chuan Ukraine chuan tun hnai maiah chuan Nato a zawm lo bawk ang tia a hrilh thu a sawi bawk a.
Mahse Johnson chuan, “|um khat phei chu min vau a, ‘Boris, tihnat che ka duh lo, mahse, minute khat bak kan mamawh dawn lo a nia'” tia a hrilh thu a sawi a.
“Inremna a awm theih nan ka hmalakna te kha min play a ni,” tiin a sawi bawk a. Putin chuan a vauna chu a ti takzet em tih erawh hriat theih a ni lo.
Mahse, Russia-in UK-a chetlakna a neih tawh ngaihtuah chuan ngaihthatna chi a ni lo thung. Kum 2018 pawh khan Salisbury-ah Russian spy hlui chu tura hraiin a awm a ni.
Putin leh Boris te inbiak atanga ni kua a liam tihah khatih laia UK Defence Secretary Ben Wallace chuan Moscow thlawk lutin Russian counterpart, Sergei Shoigu nen inbiakna an nei zui a.
BBC documentary Putin Vs the West tihah chuan Wallace chuan Russia-in Ukraine a run lovang tih an tiam chungin Russia a chhuahsan a, mahse, a tak takah chuan dawt a ni tih an hre ve ve vek tia sawi a ni bawk.
Russia-in a chakzia lantir a tumna niin, ‘Dawt ka hrilh dawn che a, dawt ka sawi tih pawh i hria a, ka daw zui zel dawn tih pawh i hria a. Ka chakin ka ropui a ni an tihna tluk a ni’ tiin Wallace chuan a sawi.
Wallace chuan Russia a tlawha thil awmdan chhutin an inbiakna kalpui dan nen Russia chuan Ukraine a run ngei dawn tih a chian thu a sawi bawk a.
Meeting an chhuahsan dawnin Russia chief of general staff Gen Vlaery Gerasimov chuan ‘mualpho in kan awm leh tawh ngai dawn lo’ tia a sawi thu Wallace chuan a sawi bawk.
He mi hnu kar hnih vel lekah tank te chuan 24 February khan Ukraine ram lutin Russia chuan Ukraine a run tan nghal a. Boris Johnson chuan he mi zan zanlaiah Ukraine President Zelensky hnen atangin runa an awm thu phone-in a dawng zui ta a ni.
“Zelensky a dam dap a” tia sawiin Johnson chuan, “Mahse, hmun tin atanga beiha an awm mek thu min hrilh a ni,” tiin Johnson chuan a sawi bawk a.
Johnson chuan Zelensky chu hmun himah an thiarchhuah theih thu a hrilh chungin Zelensky chuan Ukraine a chhuahsan loh tur thu min hrilh a ni, tiin Johnson chuan a sawi bawk.