PWD Minister-in kawng chhia en

Nilaini khan PWD minister Vanlalhlana, Mizoram Truck Drivers Association leh Mizoram Truck Owners Association te’n Kawnpui leh Khamrâng inkâr kawng chhe lai an en.
“National Highway 306 hi Mizoram mamawh chawkluhna ber a ni a, chutih laiin helai kawngpui, a bikin Khamrang leh Kawnpui inkar hi sorkar hmasa hun lai atang tawhin vawi tam tak thuam that lo ni tawh thin mah se fur a dawl zo meuh thin lo a, Mizoram mamawh chawkluhna kawngah harsatna lian tak a thlen thin a ni. Kuminah pawh PWD lam chuan fur lo thleng tur atan inhmakhuain thal laiin theih tawpa thawm that ni mah se, kumin fur a nat em avangin Mizoram mamawh lakluh kawngah harsatna a thlen leh ta a ni,” tiin ZPM chuan hemi chungchangah hian thuchhuah an siam.
An thuchhuaha a lan danin, PWD minister hian Thawhlehni khan Mizoram Truck Drivers Association leh Mizoram Truck Owners Association hruaitute a kawm a, he an inkawmna bawhzui hian kawng chhe laite hi a hmunah kalin an enho a ni.
“Kawng chhia avanga Mizoramin harsatna kan tawh mek hi sorkar chuan pawi a ti a, kan ngaihven reng a, hmalakna pawh a kal mek a ni. Thu-a sawi mai ai hian heng kawng chhe siamthat hna hian a takah hun leh tha, sum leh pai a mamawh hnem hle a, duh angin thil a tih zung zung theih loh a ni. Sorkarin theih tawpin hma a la zel dawna, mipuite pawhin Sorkar hmalakna dawhthei taka lo ngaichang turin kan inngen a ni,” PWD minister hian a ti niin ZPM thuchhuahah tarlan a ni.