Qatar mihausain United dawr leh

Qatar mihausain United dawr leh
English Premier League club zawrh lai Manchester United lei tuma dawrtu langsar Qatari mihausa tawntaw Sheikh Jassim chuan kartawp Zirtawpni deadline liam hma chiah khan a ngamna zat nena dawrna hnuhnung (final bid) a thehlut leh ta a, a ruahmanna thehluhah capital leh infrastructure investment lama a inhuamna thar a nemkai.
Sheikh dawrna kimchang hi hriat theih ni rih lo mah se club-a chanpual awm zawng zawng hauh vekna bakah Old Trafford club leiba neih zawng zawng tlaksakna tur a tel niin media lamin an tarlang.
Reuters tarlan danin, kumin March thla khan Sheikh Jassim hian United lei turin dawrna a thehlut leh a, kha kha a vawihnihna niin, tunah a vawithumna leh a tawpna atan ‘bid’ a thehlut nawn leh a, a chet dan enin Premier League club pumhmawm hi a tum ruh hle niin a lang.
He final bid chungchangah hian Reuters chuan Manchester United leh he club zawrhna buaipuitu investment bank Raine Group chu comment pe turin an ngen a, chhanna an hmu mai rih lo a, inhuamna sum pawh official-a tarlan a ni lo.
Glazer family lam chuan an club enkawl hi pound vaibelchhe ruk (USD 7.54 billion) an chhiar a, he mi tling lo hret hian a hma khan Sheikh Jassim hian a lo dawr tawh a, hnawlsak a nih hnua a inhuamna thar hian ngaihven a hlawh a, The Guardian chanchinbu chuan Arab mihausa dawrna hnu-hnungberah hian 5 billion pounds a inhuam niin an tarlang thung.
Manchester United neitu Ame-rican chhungkua hian nikum atang khan fans lamin hralh tura an nawrna tihlawhtlingin club an zuarchhuak tan a, dawrna an dawn nual zingah chemicals producer INEOS British billionaire Jim Ratcliffe leh Finnish sumdawng hausa Thomas Zilliacus an tel.
Sky Sports News tarlan danin Ratcliffe hian club pumpui pum-hmawmna ni loin chanpual tam ber a hauh a; INEOS lam hian club lei an tum dan chungchanga zawhna an chhang lo thung.
Engzat pawhin Manchester United hi hralh se sports indawrna kawnga hraw ber a ni tawh tho tho dawn a, a hmaa Chelsea leina mana US dollar vaibelchhe 5.2 baka leiba rulh leh investment kalpui tel kha a khum dawn a ni.
Deloitte zirchiannain a tarlan dan thar berah United hi khawvel football club hausak lama pangana ni mekin, khawvel sport huanga rohlu ber zinga pakhat a ni.