Quarter thiah tum sut ngen

Sawrkar quarter awmkhawmnaa building zingah thiah ngai lo, kum engemawzat la luah tlak a awm tih an finfiah avangin helaia cheng chhungkuate tibuai zawnga thiah tumna thupek chu sut leh turin sawrkar an ngen tih PC party chuan an sawi.
PC Gen. Hqrs. thuchhuak chuan, July 13 khan an president Vanlalruata hoin Luangmual Govt. Complex, sawrkarin ‘Ainawn Veng’ tia a hming a thlak hmuna sawrkar quarter, sawrkarin thiah a tumte a hmunah an enchiang a. Quarter thiah tum tam ber hi thiah ngai lo, kum engemawzat la luah tlak a ni tih an finfiah thu a sawi.
2023 June 22-a sawrkarin quarter luahtute chhuak tura a tih na chu, building-te a hmuna an enfiah vek hnu ah thil tul lo tawp a nih avangin order hi sut lehnghal turin sawrkar an ngen tih PC president hian sawiin, “Quarter building thiah tura tih 47 zingah hian thiah ngai pahnih khat bak a awmlo. Quarter-ah hian chhungkaw 180 vel an cheng mek a, quarter luah manah kumtin sawrkarah cheng nuai 100 vel a lut ziah a. Quarter thiah tumte hi sakthat tumna a awm miah loa; he hmalak tumna hi chhungkaw 180 chuang tul miahloa tih buaina leh sawrkara kum khata sum lut, nuai 100 vel tawpna tur niin, hmalakna awmze nei lo leh heksak thlawn a ni,” a ti.
Hetianga awmze neiloa sawrkar hmalakna hi a dem takzet tih PC party hian sawiin, quarter-te venghim tur leh awmze neia hma la turin sawrkar a ngen tih a sawi a ni.