BJP hruaitu nen Guwahati-a an thil tih Lalduhoma zawt

ZPM leader Lalduhoma chu zan khat riaka Guwahati-a BJP hruaitu pakhat nena an thil tih chu Zoram mipui hnena sawifiah turin an phut tih Congress Thalai chuan an sawi.
Congress Thalai thuchhuak chuan, kumin June 27 khan ZPM leader hi Guwahati-ah kalin, a tuk June 28-ah Mizoramah a rawn let a. Aizawl to Guwahati flight-a chuang ve tho BJP Minority Morcha National secretary nen Guwahati airport-ah hian motor var changkang takin lo hmuakin, an pahnih hian motor-ah chuangdunin VIP treatment dawngin airport atangin an kalna tur hmun lam panin an kal niin a hmuna awm ve te atangin sawi a awm zui tih a sawi.
‘North East Democratic Alliance convener, BJP palian leh Assam chief minister ni bawk Himanta Biswas Sarma hmu tura kal an ni tih thawm ri va kan hre leh ta zel hian ngaih a ti tha lo hle a. UCC implement tumna boruak a len lai leh, sakhaw zalenna nekchepa a awm mek lai hian heng thu lengvak hian Mizoram mipui thinlungah ngaihthat lohna a tilian hle,’ a ti.
ZPM leader leh BJP Minority Morcha National secretary hian Himanta Biswas Sharma an hmu ngeia sawi a ni tih Congress Thalai hian sawiin, ‘Kristian-te min nekchep a, min nekral vek duhtu BJP sum ringawt it loa, kan Kristianna humhim a nih theih nana ke pen zawk turin Mizoram political party tinte kan ngen nghal a ni,’ thuchhuah hian a ti.