R-Day-ah mi 982-te sipai huaisen leh chawimawina hlan dawn

R-Day-ah mi 982-te sipai huaisen leh chawimawina hlan dawn
Thawhtanni hi India Republic Day 2026 a ni a, kum danga tih thin angin chawimawina chi hrang hrang sem chhuah leh a ni dawn a. Kumina police, fire, home guard, civil defence leh correctional services-a thawk huaisen chawimawina leh chawimawina dang hlan tur mi 982 an awm.
Union home ministry-in thu a chhuahah gallantry medal (GM) 125 sem chhuah a ni dawn a. Huaisen chawimawina dawng tur zinga a tam ber hi Jammu & Kashmir-a thawkte niin mi 45-in an danwg dawn a. India khawchhak lama Naxal tharum thawhnaa beihpui thlaknaa thawk mi 35 leh hmarchhak atanga mi pangain an dawng ang.
Huaisen chawimawina hlan tur zingah hian kangmei chhuak beihna leh mi chhanchhuah hna thawhnaa che tha fire service rescuer panga an tel bawk.
Sorkar thuchhuah chuan Jammu & Kashmir Police chu state mala huaisen chawimawina dawng tam ber an ni dawn a, mi 33-in an dawng dawn a. Maharashtra Police atangin 31, Uttar Pradesh Police atangin 18 leh Delhi Police atangin 14-in an dawng ang.
Central Armed Police Force (CAPF) atangin CRPF chu huaisen chawimawina dawng tam ber tur niin mi 12 hnenah hlan an ni dawn bawk.
President’s Medal for Distinguished Service (PSM) mi 101 hnenah leh Medal for Meritorious Service (MSM) chawimawina mi 756 hnenah hlan an ni ang.
Danin a sawi fiahnaah chuan huaisen chawimawina dang theite hi thil thleng zen zen lova huaisen taka che leh mi nunna leh bungrua emaw chhan nana nunna thapa che chhuak te, mi sual man leh venna kawnga huaisen bika che te, hriat lawk loh thil a thlen changa an hnain tih tura a tuk chu nunna chân hlauhawm khawp a nih pawha ti thinte hnenah hlan thin an ni.
PSM hi an hnathawha thawk tha leh thawh hlawk bik hnena hlan thin niin Meritorious Service hi an hnaa inpe leh tangkai, an hnaa tuina tak tak nena thawk thin bik hnena hlan thin an ni thung.