Rafale, Su-30, MiG-29 & Jaguar nen R-Day-ah ‘Sindoor’ formation lantir dawn
Rafale, Su-30, MiG-29 & Jaguar nen R-Day-ah ‘Sindoor’ formation lantir dawn
Indian Air Force (IAF) chuan Republic Day 2026 lawmnaa an inpho chhuahnaah ‘Sindoor’ formation an lantir dawn a, van sanga an theihna pho chhuah hunah hian Operation Sindoor-a an hman indo thlawhnate pawh an tel dawn.
He formation-ah hian Rafale indo thlawhna pahnih, Su-30 thlawhna pahnih, MiG-29 indo thlawhna pahnih leh Jaguar indo thlawhna pakhat an tel dawn niin thuneituten an sawi.
Operation Sindoor kha May 7 khan mi firfiakten Pahalgam-a mi beia mi 26 an thah chhan let nana kalpui a ni a. Pakistan chuan chhang letin ram pahnihte hi May 7 leh 10 inkar an indo phah a. Beihpui an thlaknaah hian India chuan minute 23 lek chhungin Rafale indo thlawhna, SCALP missile leh HAMMER bomb hmangin mi firfiak 100 chuang an that hman niin an insawi.
Mi firfiak an thahte hi Jaish-e-Mohammed, Lashkar-e-Taiba leh Hizbul Mujahideen-a mite an ni hlawm a. Defence ministry chuan he beihpui thlak hmang hian mi firfiakte hmunhma tam tak tihchhiat a ni a, civil mite erawhin a tlem thei ang ber an tawrhna turin chet a ni tih an sawi.
Hetih lai hian Delhi Police chuan ram khawpui bera Republic Day lawmna hmunah hian venhimna tihchak lehzual nan leh hlauhawm awm theih hriat ran a nih theih nan AI hmang smart glass leh mi hmel hriat chhuah leh chhinchhiah zung zung theihna tur hmanrua an hmang dawn tih an sawi.
Additional Commissioner of Police Devesh Kumar Mahala-a chuan venhim hna kalpuina turah hian technology changkang ber ber hmanga thiam hmanrua an chhawp dawn a, hlauhawm chu hetiang hmanrua hian an veng dawn tih a sawi.
CCTV camera an bun zawng zawng chu video analytic leh Facial Recognition System (FRS) hmanga thiam niin hei hi police-ten mi rinhlelhawmte dik chat chata an hriat chhuah theihna tur a ni dawn a. “Video analytic hi chi hrang hrang a awm a, a vaiin kan hmang tangkai vek dawn a. Tun tumah hian a bik taka thuam thlalakna kan hmang ang a, tarmit tha bik kan hmang dawn bawk a ni,” tiin Mahala chuan a sawi.
Mahala-a chuan tun tum hi Delhi Police mi leh saten Republic Day lawmnaa technology changkang hmanga siam hmanrua an inbel hmasakna ber tur a nih thu a sawi a. Police thlan bikten smart glass vuahin sipai kalrem lâm neihna kawng tluanah an awm ang a, mipui an thlithlai ang a, hlauhawm hnai thei ang chi an veng dawn a ni.
India-in ama puala danpui a hman tan ni, Republic Day hi Thawhtanniah ram pumah lawm a ni dawn a, a lawmna pui ber hi Delhi-ah neih niin sipai kalrem lâm bakah an hmanrua leh theihna chi hrang hrang pho chhuah a ni ang.