Rahul-an BJP te paihthlak ngei rin thu sawi

Congress leader Rahul Gandhi chuan nakum inthlanpuiah opposition tangrualte chuan BJP te chu thuneihna ata an paihthlak ngei theih tur thu a sawi.
Gandhi hian US tour a nei mek a, heng thute hi Washington a National Press Club a journalist te nena an inkawmnaa a sawi a ni.
“Inthlan lehah Congress party chu a che tha ngawt ang a. Mi te a barakhaih ang. United opposition chan BJP te an hneh ang,” tiin a sawi.
“RSS leh BJP te inkawp tangdun chu hneh theihloha ngaihna a awm a. Mahse, chutiang a ni lo. Sawi lawk neih ka duh a, inthlan pathum pali vela kan inbeih leh hunah BJP te hi nasa taka tihtlemin an awm ang,” tiin Rahul chuan a sawi a.
“Assembly inthlanah pawh hun khirh an hmachhawn dawn a. Karnataka kan tih ang bawkin kan che dawn a. Mahse, chung te chu Indian media te inzawt a nih chuan chutiang lo chuan an chhang ang che u,” tiin a sawi bawk. May 10 a Karnataka Assembly inthlanah khan Congress te chuan majority lain BJP te an nawr liam a ni.
“BJP te hi Indian 60% chuang ten an vote hauh lo, Narendra Modi pawh an vote hek lo, chu chu hriat reng tur a ni a. BJP te hian hmanrua hrang hrang an nei a, an au a, an te a, an tibuai a, an ankhum a, chutiang lamah chuan an tha a. Mahse, Indian mipui tam zawkin an thlawp hauh lo,” tiin a sawi bawk a.
“Democratic architecture din that leh hi thil awlsam a ni lo, a harsa dawn a ni. Hun a mamawh bawk ang a, mahse, BJP te hneh turin a bulthut kan nei tha in ka hria,” tiin kum 52 a upa Congress party president hlui chuan a sawi bawk a.
“Media atang erawh chuan Modi hneh chu theih loh angin an sawi ang a, a tam ber chu alova luakchhuaka sawi a ni. Modi hi a derthawng hle a, India ramah hna nei lo tam tak an awm a, thil man a sang em em a, heng thil te hian Indian mipui te a khawih takzet,” a ti bawk a.
“India ramah nasa takin democracy namnul tuma beihin a awm a, democracy an beih dan chu ka tan hlawkna a ni thung,” tiin MP atanga an ban chungchang a sawi bawk.
Parliament inthlanpui neih hmain kum khat pawh a awm tling tawh lo va, Congress te chu Opposition party te nen inbiakna an nei mek reng a.
Kum 2024 inthlanpui India rama neih hmain Assembly election panga – Madhya Pradesh, Chhattisgarh, Rajasthan, Telangana leh Mizoram-ah te kumin kum tawp lamah neih a ni phawt dawn a, chungte chu Lok Sabha inthlan aitechhinna anga ngaih a ni.
“Opposition te an inlungrual a. Party tin te nen inbiakna tha tak kan nei mek reng a ni. Thil tha tam tak a thleng mek a, Opposition te kan din tlanna tur lamah sawihona nasa zawk neih la ngai a ni mai chauh zawk,” tiin a sawi a. “Mahse, Grand Opposition alliance a awm ngei ka ring,” tiin a sawi.
Gandhi chuan sorkar chu India rama institution te thunun vek tumah puhin hei hi opposition tin te sawi dan niin mahse ruling party BJP te chuan an hnawl thung.
Congress leader chuan Parliament membership laksak a nih chungchang pawh sawiin ‘a tana hlawkna zawk’ tiin a sawi a. “Mahni inenfiahna hun min siam a. Thil pek hlu tak min pe niin ka hria. An man lo mai thei a, mahse, min pe a ni,” tiin a sawi bawk.
A nunna atana hlauhawm thei thilah engmah hlauhthawnna a neih loh thu leh insumkarna neih a tum loh thu a sawi bawk a. “Thaha vauna lam ka ngaihven lo. Tute pawh thi vek tur kan ni a lawm chu chu ka pi leh ka pate atanga ka zirchhuah a ni a. Chutiang thil avanga hnungtawlh chi ka ni lo,” tiin Congress leader chuan a sawi bawk.
Rahul-a pi Indira Gandhi chu kum 1984 khan a bodyguard-in a kaphlum a, a pa Rajiv Gandhi pawh kum 1991 ah thihchilh bomb hmanga tihhlum a ni bawk a, an pahnihin prime minister ni ve ve an ni.
Zawhna dang an zawhah China in India ram a luah tia sawiin Congress leader chuan, “A nihna takah chuan China hian kan ram a luah a, 1,500 sq.km a luah mek a ni. Chu chu pawm theih a ni lo va, mahse, prime minister Modi hian eng ngaihtuahna nge a neih ka hre lo va, kan hriat loh a hria pawh a ni mahna,” tiin a sawi bawk a.
Hindu state-a siam tumna chungchangah India ramah hmathlir leh ngaihdan pahnih a awm mek a ti a. Pakhat chu BJP te vision niin chu chu centralising leh polarising vision a ni a ti a. “Vision pahnihna chu decentralised view leh embracing vision a ni. Compassionate vision a ni a, chu chu a inlailang mek a, India nihna dik tak niin India democracy dik tak chu a dingchang zawk dawn a ni,” tiin a sawi bawk.