Rahul-an House-ah PM sel na hle

Rahul Gandhi chuan Prime Minister Narendra Modi nena inzawmna nei billionaire Gautam Adani, a company te US-a inbun short-seller Hindenburg Research tena an stock manipulate dan leh accounting fraud an kalpui dan an lailan avanga nasa taka tlahniam mek te chu na takin parliament-ah a bei.

Congress leader tun hnai lawka 3,500-km Bharat Jodo Yatra nei zo fel chauh chuan PM Modi chu sector hrang hranga Gautam Adani business empire puiah puhin hei hi ruling BJP MP te chuan nasa taka bei let nghal thungin Rahul Gandhi thusawi chu an sawisel nasa hle.

“Adani hian a sumdawnna luhchilh tawhah hlawhchhamna a nei ngai lo – solar energy, wind energy a ni emaw a hlawhtling vek. Yatra ka neihnaah mipui ten engtiangin nge Adani hian sector hrang hrangah a hlawhtlin em em theih vek, prime minister nena an inzawmna eng nge tiin min zawt thin,” tiin Rahul Gandhi chuan Lok Sabha-ah a sawi a, Adani chuan PM Modi-an ram dang a tlawhna apiangah pawh contract a hmu zui zel a ti bawk.

“Mipui ten engtiangin nge Adani hausakna chu kum 2014 a $ 8 billion atanga kum 2022 a $ 140 billion a a kai chhoh theih tiin min zawt a ni,” tiin Rahul chuan a sawi bawk a.

Congress leader chuan Adani chu khawvela mihausa 600-na vel atangin kum 2014-a BJP te rorel hnuah pahnihnaah a chho nghal thei a ti bawk a. Adani-an airport paruk enkawlna a chan theih nan rules te siam danglam a ni, a ti bawk.

“Puhna huaisar tak sawi mai suh, a finfiahna nei rawh,” tiin Law Minister Kiren Rijiju chuan Congress leader chu a chhang let thung a. “Senior MP i ni tawh a, mawhphurhna nei chunga tawng a ngai. Parliament ah thutak turin kan ngen che a, pawn lama sawi ang apiang sawi a rem lo,” tiin Rijiju chuan a sawi bawk.