Rahul Gandhi an Modi sorkar bei na hle

Paper leaks chu ‘anti-national’ act tia sawiin Congress leader Rahul Gandhi chuan Narendra Modi sorkar chu National Eligibility-cum-Entrance Test (NEET) a thil fello awmah leh National Eligibility Test (NET) thulh chungchangah natakin a bei a.
Gandhi chuan paper leak chu ‘Bharatiya Janata Party (BJP) leh an parent organisation tena education institution an thunun vek’ result a ni a, ‘a ngai anga kan let leh a nih loh chuan hetiang buaina hi a awm zui zel ang’ tiin a sawi.
Gandhi chuan Prime Minister Modi chu inthlan result chhuah hnuah ‘psycjologically tlakchhiatna a nei’ tia sawiin zirlai nuai tel te hmalam hun aiin a sorkar survival a ngaihtuah zawk a ti bawk a. Congress chief hlui chuan Modi cuan paper leak ah sawi a nei duh miah lo va, a ngaih pawimawh ber zawk chu Lok Sabha Speaker a ni mek tiin a sawi bawk.
Congress leader chuan inthlanah khan Modi concept chu tihchhiatina awm tawh a ti bawk a. Prime Minister a Atal Bihari Vajpayee emaw Manmohan Singh te ang inngaitlawm tak te kha la awm se chuan sorkar hian heng issue te hi chinfel dan an nei tha ang a ti bawk a.
“Modi hian sorkar kalpui dan turah harsatna a tawk dawn, a chhan chu a sorkar kalpui ve dan chu mipuitea hlauhna tuhna hmangin a nih thin vang a ni a. Tunah chuan mipui ten an hlau tawh lo va, chuvangin inthlanah khan Modi basic concept chu tihchhiatin a awm tawh” tiin Gandhi chuan a sawi bawk.
Rahul Gandhi chuan Opposition te chuan June 24 a 18th Lok Sabha thutkhawm hmasak berah NEET chungchang chu an aupui dawn tiin a sawi bawk a.
“Prime Minister Modi an Ukraine-Russia indona leh Israel-Gaza indona a titawp thei tia sawi a ni a. Mahse, exam paper leak erawh a titawp thei lo emaw titawp duh lo thung” tiin Gandhi chuan a sawi bawk.
“Ram pumah idea of Vyapam zauh tumna a awm” tia sawiin NEET contoversy chu Madhya Pradesh a Vyapam examination leh recruitment scam nen a tehkhin bawk a. Sorkar chu thleibik neia engmah kalpui lo tura tiin ‘paper pakhata rules chu a dangah pawh hman tur’ a ti bawk.
Gandhi chuan tun hnaia Varanasi a tlawhnaah Prime Minister chu mipui ten an hlauh tawh loh zia pholanin a awm tiin a sawi a. PM Modi chu slipper a lo vawm a ni a ti bawk a.
“Narendra Modi slipper a vawm kha thil dik a ni lo va, a semawm a, security felloh zia pawh a lang. Sorkar policy kan duhlohna te chu Gandhian takin kan lantir tur a ni a, democracy ramah tharumthawhna leh huatna in hmun a chang lo” tiin Rahul Gandhi chuan a sawi bawk.