Rahul Gandhi thusawi BJP ten helh hle

Leader of the Opposition Rahul Gandhi an Lok Sabha-a Budget sawihona neiha a thusawi laiin bengchheng siam a ni zing hle a.
“Ka thusawi hnuhnung berah khan he ramah hian hlauhna boruak tha lo tak thil dang zawng zawng fanchhuak a thlen mek thu ka sawi a” tiin Rahul Gandhi chuan Lok Sabha a Leader of Opposition a thlan a nih hnua a thusawi hmasakna berah a sawi a. “Ka thiante pawh an nui a, mahse, an hlau tho bawk,” tiin a sawi zui bawk.
Chutih lai chuan Speaker Om Birla chuan Budget thlurbinga thusawi turin a lo ti thung a. Rahul Gandhi chuan, “Defence Minister hian prime Minister nih tum ta se la, harsatna lian tak a awm a ni, hlauhna a awm tlat,” tiin a sawi zui a.
“Eng vangin nge BJP a kan thiante hi hlauhlawpa an awm le, minister ten hlauh an nei a, India loneituten hlauh an nei a, hnathawk leh thalai ten hlauh an nei a ni,” tiin Gandhi chuan a sawi a.
Rahul Gandhi chuan BJP te lotus symbol chu Mahabharata epic a Abhimanyu man a nih phahna “chakravyuh” nen a khaikhin a. Kum zabi sawmhnih pakhata ‘chakravyuh’ te chu heng mite hi an ni, tia sawiin, Prime Minister Narendra Modi, Amit Shah, Mohan Bhagwat, Ajit Doval, Mukesh Ambani leh Gautam Adani te chuan he “chakravyuh” hi an thunun a ti bawk a.
House boruak a tang zui hle a. Speaker Om Birla inrawlh nghalin parliamentary position zahawm tak chelh mek a nih avangin mihring hming lam lo turin a ti a.
“I duh chuan NSA leh industrialist te hming ka paih ang e” tiin Gandhi chuan Speaker Birla a chhang a.
“Chakravyuh” awm theih chhan thil pathum a awm tia sawiin chung te chu – idea of monopoly, institution and agencies leh political executive te an ni a ti a. “Heng thil pathumte hian he ram hi a sawp chau a ni. Ka beisei dan chuan Budget-in heng thil pathumte hi a tichau zawk turah ka ngaih a ni a. Budget thil tum ber chu framework awmsa te tihchak a ni si a” tiin Rahul Gandhi chuan a sawi bawk a.
Tax terrorism leh sorkar policy industrialist te a duhsakna chuan small leh medium business te tichhiain chuvang chuan a nia India ramah thalai hna nei lo an tam em em, tiin Rahul Gandhi chuan a sawi bawk a.
Budget-a internship programme kalpui tur chungchang sawiin Gandhi chuan ‘fiamthu a niang, a chhan chu India-a company lian 500 te ah chauh kalpui tur a ni’ a ti bawk a, “thalaite ke titliakin bandaid-in in tuamsak a ni,” a ti.
Tunlaia thalaite tana thil pawimawh ber chu exam paper leak chungchang a ni a, mahse, Finance Minister chuan a budget speech-ah a sawi lang hauh lo. “Chu mai a ni lo, FM Nirmala Sitharman chuan kum 20 chhunga Education budget hniam ber a pe a ni,” a ti zui bawk.
“Ram hmangaihtu tiin in insawi a, sipaite puih an ngaihnaah Budget-ah naia khat pawh in dah leh si lo” tiin Rahul Gandhi chuan a sawi bawk.
Dalits, Adivasi leh backward classes te chungchang sawiin Rahul Gandhi chuan heng group te hi India population atanga 73% lawih te an ni a, sumdawnna lian, corporate India leh sorkarah aiawh an nei ve lo a ti bawk.
Rahul Gandhi chuan a thusawi tifiah tura thlalak a pholang chu Speaker Om Birla chuan a khak a. Mahse, Rahul chuan Lok Sabha camera te chu an biased avangin House-a thlalak a pholan duh an tilang duh lo a ti bawk a.
Rahul Gandhi thlalak lekchhuah chu Budget halwa ceremony thlalak niin, “Adivasi, Dalit emaw OBC officer he thlalakah hian ka hmu miah lo” tiin a sawi zui a. Sitharaman chuan a lu dawma a nui chu Rahul chuan a nui na a, thil nuihzatthlak a ni lo a ti zui bawk.
Rahul Gandhi chuan “chakravyuh” chu an tihtawp tur thu sawiin, “He thil tihtawp nana tha ber chu caste census a ni a, mahse, chu chu sorkar mek lai hlauh ber a ni” a ti bawk a. Caste census in duh emaw duh lo emaw kalpui ngei tur a ni ang tiin a thusawi a tlip a ni.