Congress leader Rahul Gandhi-an Uttar Pradesh-a Rae Bareli atangin a in-candidate tur thu a puan khan eng vanga Kerala inthlanna zawhfel hnuah chauh sawi nge a nih tihah zawhna a awm a, Wayanad, Kerala atangin a in-candidate tho bawk a ni.
Representation of the People Act (RPA), 1951 chuan election ah mi pakhatin constituency pahnihah chauh a chuh thei a ti a, mahse, thlan tlin a nih chuan seat khat a khawi emaw zawk zawk a chhuahsan a ngai a ti bawk.
-- Advertisement --
Bituk a awm em?
RPA Act sub-section, 33(7) chuan candidate chuan seat hnih chauh a chuh thei a ti a, chu chu kum 1996 a amendment siam hnua kalpui tan a ni a, a hma chuan candidate-in a chuh theih zahah bituk a awm lo.
Mahse, Section 70 chuan candidate chuan seat khat chauh a luah thei ang a, seat hnihah tling mah se pakhat a chhuahsan a ngai a tithung a. Chumi awmzia chu seat hnihah a chak a nih pawhin pakhat zawk chauh luah theiin a chhuahsanah inthlan that a ngai dawn a ni.
Chief Election Commissioner hlui N. Gopalswami chuan candidate in seat hrang hranga a chuh teuh phal lohna chu inthlan zawh hnua byelection tam tak nih zui a ngaih thin vang a ni a ti a.
Election Commission of India leh Law Commission te chuan RPA Act chu siamthata mipakhatin seat khat chauh chuh theia siam ni se tiin an rawt tawh a. Mahse, politician te chuan seat hnih chuh theih chu kaltlangpui an duh zawk tlat a, parliamentarian an ni a, dan siamtute an ni bawk si a ni tiin Gopalaswami chuan a sawi.
Assembly poll a chuh tur chuan candidate chu chu State-a voter a nih a ngai a. Mahse, Lok Sabha-ah thung chuan khawi constituency ami pawh nise a in-candidate thei thung a ni. Constituency a voter register a nih chuan mi tu pawhin India ramah Assam, Lakshadweep leh Sikkim tihlohah chuan a in candidate thei vek a ni.
Inthlana chuh thei kum
Lok Sabh leh Assembly poll a chuh thei tur chuan kum 25 chin nih a ngai a, mahse Rajya Sabha leh State Legislative Council a chuh tur chuan kum 30 chin nih a ngai thung. Educational qualification-ah bithliah a awm lo thung a, candiate chu India khua leh tui, ram chhung constituency khawi berah emaw vote nei leh pawikhawiha kum hnih aia tam hremna tawk lo a nih chuan a chuh thei vek.
Candidate te disqualify theih dan
Government of India emaw State sorkar hnuaia office of profit a nei a nih chuan house member a nihna atanga paih theih a ni a. Chumi lovah pawh court-in rilru lama chiang lo a ti a nih emaw sum lama tlachhia a leiba rulthei lo, India khua leh tui ni lo leh ram dang khua leh tui nihna nei an nih chuan disqualify theih an ni.
RPA Act hnuaiah pawi khawihtu kum hnih aia tam lung in tantir tur a nih chuan inthlan a chuh thei lo a ni bawk a. Bail-a chhuak emaw a conviction chu appeal mek pawh ni se inthlan a chuh thei chuang lo a ni.
Candidate chungchanga ECI thil thlak danglam
ECI chuan inthlan political party funding chungchangah rules a siam tha nasa hle a. Tuna dan thar berah chuan cash donation limit chu Rs 20,000 atangin Rs 2,000 ah a tihniam a. Electoral Bond Scheme, January 2018 atanga hman tan mi tu tih hriat lohin party-a sum an thawh theihna chu Supreme Court-in tun hnaiah a titawp tawh a. Kum 2024 bikah ECI chuan bank vehicles a cash transportation chu ni tlak hnuah kalpui a khap bawk a. Commission chuan cas, liquor leh drug phurh nana non-scheduled chartered flight te a enfiah bawk a ni.