Tamil Nadu party 49-in SC-ah SIR kalpui khing dawn

Tamil Nadu party 49-in SC-ah SIR kalpui khing dawn
Tamil Nadu chief minister, rorel lai, Dravida Munnetra Kazhagam (DMK) hruaitu, MK Stalin-a hova all-party meeting chuan Tamil Nadu tela state leh union territory 12-a voter list ennawna Special Intensive Revision (SIR) thawh hnihna kalpui mek chu Supreme Court-a khin an tum.
Stalin-a hian Pathiannia all-party meeting thutlukna hi X-ah tar langin SIR kalpui phenah hian mipui rorelna chanvo tihkian tumna a awm a, political party-te chu chumin do tur chuan an che chhuak dawn tih a sawi.
“Tamil Nadu-a miten vote thlak theihna chanvo an neih laksak tumna leh mipui rorelna tihhlum tum mekna, SIR kalpui mek dodal tur hian party tin kan inlungruallin aw kan chhuah a ni,” tiin Tamil Nadu chief minister hian X-ah a tar lang.
Hei bakah hian DMK hruaitu chuan Election Commission of India chu kum 2026 state inthlan zawh hnuah ram puma voter list ennawn chu a hun taka chhawp chhuak hman turin a ti bawk.
“Voter list ennawna inhnialna leh rinhlelhna awm mekah hian kum 2026 inthlan hmaa a hun tak leh ECI pawm lohte tel miah lova list tichhuak turin kan phut a, vawiin hian all-party meeting chuan Supreme Court kal turin thu kan titlu a ni,” tiin Stalin-a chuan a tar lang.
Inhmuh khawmnaa tel party leh SIR kalpui mek do tura an thlawpnaah lawm thu a sawi bawk.
“All-party meetinga tel party 49 hruaitute chu kan rilru ang min tawmpui avangin ka lawm a. Lo la tel ve lote pawh mipui rorelna humhim tura min thlawp zel turin ka ngen a ni,” a ti.
Meeting-ah hian DMK bakah party 49 an tel a, lemchan thiam, politic khel zui ta, Vijay-a kaihhruai, Tamilaga Vettri Kazhagam (TVK) chu an tel ve lo va. Anni leh DMK inkarah hian inrem lohna lian tak awmin a beih pawh an inbei nasa hle.
TVK an tel ve loh chungchangah hian DMK thupuangtu, TKS Elangovan-a chuan BJP thinrim an hlauh avanga tel lovah a puh.
Hetih lai hian TVK chuan puhna hi chhangin DMK chu Kerala-ah pawh SIR dodalna ang chi assembly-a pass duh lovah a puh let a. All-party meeting chu thil tak tak ti lova inthenna siamtu mai niin a sawi.
TVK hian a hmain thuchhuah an lo siam tawh a, SIR chu tha lo an ti a, mipuite chu ‘a chhan tak’ chhuia hre hmasa turin an lo ngen tawh.
Hetih lai hian Bihar-a SIR thawh khatna lo kalpui tawh chu Supreme Court-ah khin mek a ni a. Bihar-ah hian inthlan a awm dawn mek bawk.