Raltlan karah ralthuam keng inzep lo turin CYLA-in chah

Bangladesh atanga Zohnahthlak raltlante karah ralthuam keng leh Mizoram chhunga an ralthuam siam enchhin an awm thin nia an hriat thu Central Young Lai Association chuan sawiin, hei hi an duh loa, ti tawh lo turin an chah tih an sawi.
Central YLA thuchhuak chuan, tunhnaia Bangladesh ramchhung a ralmuan loh avangin Bawm unau tam tak Mizoramah rawn raltlanin, an ni pawhin an theihna sang berin duat leh hmangaih takin an lo dawngsawng a. Chutihrualin raltlan zingah ralthuam keng pawl an inzep a, kan ram leh hnam himna leh muanna tichhe thei zawnga khawsa in, ralthuam tawlh leh chelek inzirtirna te a awm tih a sawi.
Central YLA sawi danin, kumin June 26 khan Chamdur ‘P’ ram chhungah tualchher bomb (improvised explosive device /IED) enchhin a ni tih hriat a ni a. IED test a ni hi tha lo an tiin an duh lo takzet tih a sawi. ‘Raltlan leh tualchhung mi hrim hrim, ralthuam leh ruihhlo kaihhnawihah inhnamhnawih lo tura hriattir an ni a. Inhnamhnawih luite hriatchhuah an nih chuan kan ram leh hnam, mipui himna atan dan angin an chungah hma lak a ni ang,’ a ti.