Raltlan kirtir thenkhat an kir, thenkhat chin hriat loh

Bangladesh atanga Mizorama tlanchhia, BSF te’na an lo kirtirte zingah Bangladesh-a kir leh an awm a, a kir lote erawh an chin hriat a ni lo.
June ni 15-a Mizoram lut, BSF te’n Lawngtlai District-a Kamtali khua atanga a tuka an kirtir lehte hi Bangladesh-a mahni khuaa kir leh ngam chi an ni lo a, ramhnuaiah te an kal kual hnuah engemaw zat chu khua an lut tawh tih thu dawn a ni.
BSF te kirtir lehte hi mi 200 chuang an ni a, Bangladesh-a Chittagong Hill Tracts-a Zo hnahthlakte niin, khaw hrang hrang 13 vela mite an ni.
Thu dawn danin, an zinga mi engemaw zat chu Chittagong Hill Tracts-a Fiangpidung khuaah an lut a, eng zat chiah nge an nih hriat ni lo mah se thudawnna pakhatah chuan mi 200 chuangah khan a zatve vel an ni ang tih a ni.
Fiangpidung-ah hian awmkhawm an tum a, mahni khuaa kir leh an ngam loh bakah Fiangpidung atang hian remchang hmasaah Mizorama tlan luh an tum tih thu dawn a ni.
Mi dangte chin hriat a ni lo a, BSF te’n an kirtir hnuah Bangladesh sipai an hlauh tho avangin an tlanchhe darh a, chhungkua inhloh te pawh an awm.
Khuaa an luh loh avangin ramhnuaiah mi engemaw zat chu an la awm tihna a ni a, Mizoram lam leh Bangladesh lama awm an awm tih thu dawn a ni.
Fiangpidung-a awm tate hi an chau hle a, an kete pawh a durh nasa tih thu dawn a ni a, ramhnuaia la awmte pawh an chauh bakah dam lote an awm tih thu dawn a ni.
Thu dawn danin, Lawngtlai district-a raltlante kal kawng velah anmahni puih tumte tan chet a har a, BSF an duty ngawrh avangin ramhnuaia anmahni ngaihven tumte pawh an che hlei thei lo. Ramri vela tangkhang an awm ang tih ringa zawn hmuh tumte pawh BSF te’n an lo kirtir leh thin a, khaw thenkhat hotute phei chu BSF leh Assam Rifles te’n raltlan lut thar an awm em tih zawtin, tawngkam hriam tak takin an be thin tih thu dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More