Lai Autonomous District Council-a member (MDC) 9 chu Ningani khan Zoram People’s Movement party-ah lawmluh an ni.
Lawmluhte hi MNF atangin MDC pasarih – Manghmung Chinzah, BN Thangpuia, CL Lianzuala, V Zathanga, T Lalengmuana, Tuturu Singh leh L Lalhmachhuana te an ni a. Independent MDC pahnih N Zangura leh LR Dingliana Chinzah an tel bawk.
Lawmluttu ZPM Gen. Hqrs vice president W Chhuanawma chuan ram leh hnam hmasawnna tura ke pen a, eirukna tirem a, mipui tana ke penpui atan ZPM policy-ah an lawmlut tih a sawi a. State-ah ZPM a sawrkar hlim leh LADC sawrkarah sawrkarna siam thei an awm loh lai khan ZPM-in an duh chuan sawrkarna an siam thei a, mah se, state sawrkar hmasaten an thuneihna hmangsuala District Council sawrkar an pawngsual thin chu tihtawp an duh a, an thuneihna an hmang sual ve duh lo, tih a sawi.
LADC hnuaia Chandmary bial MDC by election leh village council inthlanpui awm turah ZPM candidate-te vote turin ZPM hruaitu hian mipui a sawm a. “ZPM chuan Autonomous District Council sawrkar inrelbawlna hi zahawm kan ti a. MDC by election leh VC inthlanah ZPM party lo thlangtling ula, ngelnghet leh zahawm takin LADC rorelna kan siam anga, kan tibeidawng lo ang che u,” a ti. ZPM chu sawrkar hma leh sawrkar hnua thusawi danglam ve ngai lo an ni tih a sawi a ni.
Lawngtlai East bialtu MLA Dr Lorraine Lalpekliana Chinzah chuan lawmluh inkhawmah hian thu a sawi bawk.
LADC-a MDC 9-ah ZPM ah lut
Get real time updates directly on you device, subscribe now.